Ngipon ni Drakula
MFELIXBERTO A. ESCLAMADO, JR. Mactan, Lapu-Lapu City, Cebu
anananggot si Israel sa ilang dapit sa Mayopay. Daghan siya’g mga suki nga kanunay niyang hatdan og bag-ong ‘dawat’ sa iyang tuba. Usahay maabtan siya’g gabii sa iyang pagpananggot. Ug kanunay siyang makadungog og mga tingog sa kagabhion sama sa kikik ug wakwak. Dinhay mga higayon nga uyugon ang iyang sanggutan samtang siya atua sa tumoy sa lubi. Dihay kausa diriyot siya mahulog kay hilabihan kakusog ang pag-uyog. Ingon sa mabali ang tibuok punoan sa lubi. Nagtuo siya nga naglinog samtang nagpadayon pag-abis sa butay sa iyang gisanggutan.
Kaniadto may nadunggan siyang tabi-tabi sa iyang mga silingan nga si Drakula molupad panahon sa gabii, ilabi na kon takdol ang buwan. Matod sa nakakita tag-as kini og mga tango nga nagpangidlap panahon sa kagabhion. Daghan ang nagtuo nga bulawan kini.
Sigon sa sugilanon mogawas kuno si Drakula sa tungang gabii, ilabi na kon hayag kaayo ang buwan. Maglupad siya nga may kapa sa iyang likod, nga matod pa sa nakakita, mora siya’g si Superman.
Daghan na ang nabiktima ni Drakula, usa ka mangtas nga mosuyop og dugo sa tawo. Sa higayon nga makainom na siya og dugo sa tawo, mosamot siya kakusgan. Apan si Israel wa batia og kahadlok. Gusto niyang ikaharong si Drakula bisan og nagkahulogan kini sa iyang kamatayon. Nangandak siya nga dili gyud kini niya sibugan. Gusto niyang makita ug makuha ang ngipon ni Drakula. Maadunahan siya kon iya kining maangkon. Pinaagi sab niini maangkon na niya ang dalaga nga iyang gihigugma nga karon padayon nga nagtamihid kaniya. Kanunay man god siyang yam-iran sa kadalagahan sa ilang dapit tungod sa iyang kakabos ug kapalahubog.
HALAWOM na ang gabii. Wala pa si Israel mopauli bisan nahurot na niya’g sungko ang iyang mga sanggutan. Daghan na siya’g ‘nadawat’ nga tuba, apan nagpabilin gihapon sa sanggutan. Nagpaabot na ang iyang mga suki. Apan paabuton pa niya si Drakula. Taudtaod may nakita siya didto sa ibabaw nga bahin, usa ka linalang nga naglupad ug nagpaingon sa iyang nahimutangan. May kapa kini sa iyang likod. Si Drakula. Miatubang kini kaniya nga siga kaayo ang pula nga mga mata. Karon nangurog si Israel sa kahadlok ug ang sanggot nga iyang gigunitan nahulog sa yuta. Kalit nawala ang iyang kaisog kaganina. Nahadlok siya kay wala na siyay hinagiban nga ikabatok kang Drakula. Giuyog ni Drakula ang punoan sa lubi.
Modagan unta si Israel dihang may tingog nga misangpit kaniya. Milingi siya ug nakita ang usa ka matahom nga babaye nga nagsul-ob og lubos puti nga sinina. :Kinsa ka?” ni Israel. “Ako si Mariel, rayna sa mga engkantada,” tubag sa babaye.
“Unsay tuyo mo kanako?” “Ihatag ko kanimo ang hinagiban nga makabuntog kang Drakula. Way hinagiban nga makabuntog kaniya. Bisan ang tinalinsang bagakay dili na makadut sa iyang lawas. Kining hinagbian nga ihatag ko nimo mao da kini ang makabuntog kaniya.”
Gitunol sa engkantada ang usa ka krus nga pilak kang Israel. “Sa higayon nga mopaak kanimo si Drakula, iduot kini sa iyang liog. Pinaagi niana mangalubo ang iyang mga ngipon ug tango nga maoy naghatag kaniya’g gahom.”
“Ikaw na lang pakig-away kaniya kay gamhanan ka man!” sumbalik ni Israel sa engkantada.
“Limitado akong oras kon makigtakos ako kaniya. Dili siya sayon buntugon kay talagsaon ang iyang gahom. Ayaw kahadlok. Tabangan tika!”
Dihang pang-iton na unta ni Drakula ang liog ni Israel kalit nga giduot ni Israel ang krus nga pilak sa liog ni Drakula. Mikisikisi si Drakula, dayon nahagba kini sa yuta. Nangatangtang ang mga ngipon ug tango sa mangtas nga nangahulog sa yuta. (KATAPUSAN)