INSPIRASYON
Sa opisyal nga paglusad sa 2018 Milo Marthon-Cebu Leg kagahapon sa Cebu Grand Hotel sa dalan Escario, dakbayan sa Cebu, nagbalik-lantaw ang Olympian
trackster nga si Mary Joy Tabal sa iyang sugilanon isip usa ka runner.
Sa iyang determinasyon, disiplina ug paningkamot, naumol ni Tabal ang iyang abilidad isip usa ka yanong runner hangtod nga nahimo siyang reyna ning maong natad sa paugnat sa kusog sa tibuok Pilipinas.
Ang sugilanon sa lumad nga taga Brgy. Guba, dakbayan sa Sugbo seguradong maghatag og inspirasyon sa gibanabanang moabot sa 18,000 ka runners nga motubag sa starting gun sa lumba nga ipahigayon karong Dominggo. Ang lumba manukad atubangan sa Cebu Normal University ug masangko sa Cebu City Sports Center (CCSC).
“I was a dreamer before. I turned my dreams to goals then goals to reality. It won’t be easy, there are road bumps but with hard work, perseverance and discipline there’s nothing
impossible,” matod sa 29th Southeast Asian (SEA) Games gold medalist.
Sa Cebu Leg, ang 29 anyos nga si Tabal dili na mosalmot gumikan kay daan na man kining adunay luna sa national finals sa Disyembre sa Laoag City isip defending champion.
Sulod na sa lima ka sunodsunod nga katuigan nga naangkon ni Tabal ang women’s title sa national finals diin duha ka mga higayon nga nakabuak siya og rekord. “It’s anybody’s game. We have strong local athletes here. They will be contending against formidable visitors,” matod ni event organizer Ricky Ballesteros kabahin sa 21K category, nga maoy qualifying alang sa 42K full marathon sa national finals.
Gawas sa 21K, ang Cebu Leg giangkuban sab og 10K, 5K ug 3K nga mga kategoriya.
Ang lumba nagtutok sab sa pagpalambo sa turismo pinaagi sa paugnat sa kusog.
“Cebu is one of the top destinations not only in the Philippines but also in the world. The people of Cebu. The organizing of the race. The beaches. I think these are the reasons,” pasabot ni Ballesteros.
Sa laing bahin, gibutyag ni Milo’s sports executive Lester Castillo nga ang mokampiyon sa national finals kuhaon isip representante sa nasod 30th SEA Games nga ipahigayon sa Manila.