‘SANTINO’ MOBIDA SA PINOY PRIDE 45
Mobalik ang binukbokay sa labing dakong boxing promotion sa nasod nga mao ang Pinoy Pride karong Nobiyembre 24 sa IEC Convention Center sa Brgy. Mabolo, Cebu City alang sa ika-45 nga edisyon niiini ug ning higayuna, ang sumosulbong nga ALA fighter nga si Jeo “Santino” Santisima maoy bida.
Sa main event sa promosyon nga giulohan og “Triple WBO Championships,” depensaan ni Santisima (16-2, 14KOs) ang iyang World Boxing Organization (WBO) Oriental super bantamweight title batok kang Mexican Uriel “Yuca” Lopez (13-6-1, 6KOs).
Mao kini ang labing unang depensa ni Santisima sa titulo nga iyang naangkon pinaagi sa 6th round TKO nga kadaugan batok kang Thai Likit Chane niadtong Hunyo 9 sa Pinoy Pride 44 sa Maasin City.
“Nagpasalamat ko sa ALA Promotions nga gihatagan ko ani nila nga opportunity. Mao ni ang akong pangandoy nga makaaway sa main event sa Pinoy Pride. Hinaot ma-successful ko ani,” matod ni Santisima sa press conference kagahapon sa Summit Circle Hotel.
Nagkanayon si ALA Promotions matchmaker Edito Villamor nga importante kining awaya alang sa 22 anyos nga si Santisima tungod kay usa kini sa mga pultahan nga kinahanglan niyang maablihan paingon sa mas dagkong mga oportunidad.
“Giplanuhan gyud na namo nga ang tanan namong fighters makaaway sa main event sa Pinoy Pride. As of now, kinahanglang makadepensa si Jeo sa iyang title unya kon nindoy ang iyang duwa, anhi nato i-base ang sunod niyang fight,” matod ni Villamor.
Ang trainer ni Santisima nga si Michael Domingo nagkanayon nga kinahanglang dili mokompiyansa si Santisima aning awaya.
“Dili gyud makompiyansaan ang kontra, maayo modepensa unya mosagol sab. Pero kon mosagol gyud ni siya, dako’g chance nga matumba gyud ni siya ni Jeo kay naa man gud power si Jeo,” asoy ni Domingo.
Gipasabot sa laing trainer sa ALA stable nga si Edmund Villamor nga usa si Santisima sa ilang mga boksidor nga aduny dakong poruhan nga mahimong regular nga world champion.
“Dako og chance si Jeo kay sa iyang timbang, dako siya ug naa sab siya’y power nga maka-usab sa style sa kontra. Ang opportunity lang gyud ang kuwang, matod ni Edmundo.
Gawas kang Santisima, mosagubang sab og title fights sa promosyon ang iyang stablemates nga sila si “Prince” Albert Pagara ug Kevin “KJ” Cataraja.
Depensaan ni Pagara (301,21KOs) ang iyang WBO Inter-Continental super bantamweight title batok kang George Krampa sa Ghana (14-3, 12KOs) samtang mag-ilog sila si Cataraja (8-0, 7KOs) ug Mexican Hugo Reyes (9-1-1, 7KOs) ang WBO World Youth super flyweight title.
Mopakita sab og aksyon sa promosyon ang laing dekalidad nga mga boksidor sa ALA stable nga sila si “King” Arthur Villanueva ug Jonas “Zorro” Sultan batok sa lainlain nga kontra.