MGA BAKWIT SA CICC NAG-RALLY SA CITY HALL
Di mominus sa usa ka gatos ka mga tawo ang ningpahigayon og rally sa gawas sa Mandaue City Hall sud sa dul-an tulo ka oras, kagahapon sa buntag.
Ang grupo ningkwestyon sa nadawat nga notisya sa pipila ka mga pamilya nga nagpuyo sa barongbarong sulod sa Cebu International Convention Center (CICC) compound, nga i-demolish sila kon di pa boluntaryong moguba niini hangtod karong Oktubre 18.
Nangayo sila og insaktong kabalhinan, sigun sa singgit sa gatusan ka mga tawo nga nagpainit sa gawas sa Mandaue City Hall.
Matod ni Jovie Rosales, ang pangulo sa grupo sa mga kasamtangang nanagpuyo pa sa CICC, di sila katugot nga papahawaon nga wa pa sila hatagi og relokasyon.
Ilang gihulagway nga wa masubay sa balaud ug di tawhanon ang buhaton sa kagamhanan sa dakbayan sa Mandaue.
Ang notisya ang gipirmahan ni Atty. Omar Redula, ang Mandaue City legal officer.
Gitug-an ni Rosales nga kapin sa usa ka gatos sila nga gipadad-an sa notisya.
“Nag-atubang nami sa office ni Vice Mayor Carlo Fortuna, ingon sila nga tagaan mi og relocation sa Casili, unya wa man lagi. Wa pa maklaro ba. Unya ila mi nga papahawaon nga ingon ana lang,” pasabot ni Rosales. Ang nanagpuyo sa compound sa CICC mao kadtong biktima sa sunog sa Barangay Mantuyong ug Guizo niadtong Marso 2016.
Nisalmot sa rally ang ubang mga sakop sa Piston, nga gipangulohan ni Piston Cebu president Greg Perez.
“Nisuporta mi nila kay kadaghanan sa among sakop sa Piston, mga driver sa jeep, naa diha nagpuyo. Luoy na kaayo sila nga nagkalisod pa gani, mawad-an na hinuon og kapasilungan,” pahibaw ni Perez.
Apan gipasabot ni Tony Pet Juanico, pangulo sa Housing and Urban Poor Office (Hudo)-Mandaue City nga ang maong grupo ang wa sa masterlist, gani giingong moabot kini sila sa 275.
Ang 288 ka mga pamilyahan ang gikatakda na nga i-relocate sa Casili.
Nipadayag og kaalarma ang kagamhanan, matod ni Juanico, nga adunay namuyo sa CICC, nga nagpakaron-ingnon lang nga lakip sa nabiktima sa sunog.
Nihimo na usab og programa ang Hudo ug City Social Welfare Services og balik-probinsya alang niadtong di lumad nga taa Mantuyong ug Guizo.
Matod ni Juanico nga gikinahanglan na nga mapahawa sa lugar ang mga nasunugan kay kuyaw na ang edipisyo sa CICC nga daghan na kini og mga liki.
Gikatakda na usab kini nga ipa-develop kay nahuman na pagbayad ang Mandaue City government ngadto sa Kapitolyo.
Samtang, lakip usab sa nisalmot sa rally ang pipila ka mga molupyo sa Barangay Looc sa lugar diin ipatindog ang medium-rise housing project sa national government. Si Jocelyn Baruc, usa sa 30 ka tag-iya sa panimay nga supak sa tukurong condominium-type nga housing project, ang nanawagan sa gobyerno ang ipahunong ang proyekto kay di ra gihapon sila mga kabus maka-benepisyo. / Fe Marie D. Dumaboc, Correspondent