SC lang mo-disqualify sa kandidato: Comelec prov.

Alang sa Cebu Provincial Commission on Elections (Comelec), ang Korte Suprema lang ang makadesisyon kon unconstitutional ang bag-ong pangutana nga gilakip sa certificate of candidacy mahitungod usab sa posibleng pagka-kombikto sa usa ka kandidato sa krimen nga nagtangag og silot nga perpetual disqualification to hold public office.

Una niini, si kanhi Comelec chairman Sixto Brillantes nisaway sa pagsukip sa maong pangutana sa COC sanglit daw sa nag-disqualify na kini daan sa mga kandidato kon motubag og “yes” sa pangutana.

Sa COC nga kinahanglang ma-fill-up sa mga mokandidato sa 2019 elections, dunay 22 ka spaces nga kinahanglang tubagon. Lakip niini ang pangalan ug uban pang basic information sa kandidato.

Sa ika-22 nga tubagunon sa COC, anaa ang pangutana labot sa pagka-kombikto sa kandidato sa krimen nga nagtangag ug silot nga perpetual disqualification to hold public office. Kinahanlang i-check ang yes o no box, depende sa tubag sa kandidato.

Kon yes ang tubag, dunay gigahin nga espasyo sa luyo sa COC aron ibutang ang detalye sa kaso apan kon no ang tubag sa kandidato, dili na kinahanglang i-detalye pa kini.

Matod ni Brillantes, “unconstitutional” kini sanglit dili man kini apil sa mga rekisito sa paglansar sa mga kandidato. Daw sa nag-disqualify na uab kini daan sa mga kandidato nga motubag og yes sa pangutana.

Apan kon si Cebu Provincial Election Supervisor Lionel Marco Castillano ang pasulti-on, ang Korte Suprema lang ang makasulti kon unconstitutional kini o dili.

Gipasabot niya nga gibutang ang maong pangutana aron lang niini. Apan gipasabot niya, nga kon dili pa final and executory ang desisyon, mahimong tubagon sa kandidato og “no.”/