Piyesta sa Naga yano nga gisaulog
Human sa makalilisang nga trahedya sa pagdahili sa yuta sa Sityo Sindulan, Barangay Tina-an nga nikalas og daghang kinabuhi ug nipapas sa dayon sa usa ka komunidad, ang dakbayan sa Naga nisaulog sa yano nga kapistahan sa ilang patron nga si St. Francis of Assisi kahagapon.
Lahi sa naandan nga piyesta human gikanselar sa lokal nga kagamhanan ang mga kalihokan aron pagduyog sa pagbangutang sa mga biktima sa landslides apan, ang relihiyusong tulumanon sa simbahan nagpadayon.
Si Cebu Auxiliary Bishop Oscar Florencio maoy nangulo sa pontifical mass alang sa ika189 nga tinuig nga kapistahan sa patron sa dakbayan.
Sa iyang wali sa misa kagahpon, si Bishop Florencio nipadayag nga iang nabati ang pag-antos sa katawhan nga naapektohan sa trahedya human siya nabiktima usab sa kalamidad niadto.
Sa wala pa natudlo nga Auxiliary Bishop of Cebu, siya nakasianti sa paghapak ni super typhoon Yolanda dihang nadestino sa Leyte niadtong 2013.
“Like so many of you, I, too question where is God? Where is the Church and the promise help to those who suffered,” matod ni Bishop Florencio.
Apan iyang nakita kon giunsa sa Ginoo sa paghatag og paglaum taliwala sa pag-antos sa katawhan samtang nakita ang hinayhinay nga pagbangon sa dapit.
Imbes sa paghimo og salosalo, daghang lumolupyo sa Naga ang mas ningpili sa pagtanyag og pag-ampo sa mga naapektohang pamilya.
Pananglitan, si Pamela Quino, 46, gikan sa Barangay West Poblacion ug nahinabi sa SunStar Cebu niingon nga nakahukom sa pagtutok sa pag-ampo alang sa mga biktima sa landslide.
Si Quino, kinsa usa ka clerk sa Sangguniang Panlungsod sa Naga, usa sa nitabang sa dakbayan sa iyang paningkamot sa pagtabang sa mga biktima sa Tina-an.
Siya ug daghan pang ubang taga Naga nga mas nipili sa mas makahuluganong pagsaulog sa piyesta sa patron sa dakbayan.