MGA SAKOP SA PDP-LABAN SA LAPU MIBIYA SA PARTIDO
Ang elected officials sa Lapu-Lapu City mibiya na sa partidong PDP-Laban ug mitapon ngadto sa Lakas-CMD human nga mipadala og suwat ni Mayor Paz Radaza ngadto sa national office sa PDP nga nagsalikway sa ilang membership.
Samtang gitug-an ni Radaza, kinsa anaa na sa iyang katapusang termino pagka-mayor sa Lapu-Lapu, nga siya maoy mokandidato pagka-kongresista sa Lapu-Lapu sa ilang partido.
Apan iyang giklaro nga sa lokal lang nga partido ang ilang pagtalikod sa Partidong Demokratikong Pilipino– Lakas ng Bayan (PDP-Laban) ug pabilin sila nga mopaluyo sa national official sa maong ruling political party sa nasud.
Wa masabti sa grupo ni Radaza ang gihimong pagdeklarar ni Secretary Adelino Sitoy, Presidential Adviser on Legislative Affairs, diin si Pajo Barangay Kapitan Junard “Ahong” Chan maoy nagsilbing standard-bearer sa PDP-Laban alang sa pagka-mayor sa umaabot nga piniliay sunod tuig.
“Ang isunod nga ibutang unta diha (standard bearer) gikan sa grupo namo sa PDP unta,” pagkuwestiyon ni Radaza atol sa regular press conference kagahapon.
Giklaro sa mayor nga way mahitabong Ahong–Radaza tandem sukwahi sa mga palakaw ngadto sa mga barangay nga adunay nagpa-ilang sinugo sa mga Radaza nga nangayo og lista sa mga supporter.
“Mahimo diay na nga PDP ko (for Congress), akong kaline up tanan dia sa laing partido? Mora man kog buang,” pulong sa opisyal kinsa nasakop sa Team Deretso.
Iyang gitataw nga pagpanglimbong sa publiko ang tabi-tabi nga Ahong – Radaza pagka-mayor ug kongresista sa Lapu-Lapu.
Sa sayo pa, una nang namahayag si Pajo barangay kapitan Chan nga mag-agad ang iyang desisyon sa pulso sa mga Oponganon kon magpapili siya pagka-mayor ubos sa PDP-Laban.
Iyang gikompirmar nga gihagad siya si Secretary Sitoy nga magpapilipagka-mayor ug moatbang sa mga Radaza.