Alegre na ang pulitika
Sugod karong adlawa hangtod sa petsa 17, mao ang filing sa certificate
of candidacy (COC) sa gustong magpapili sa 2019 elections. Dinhi na nato mahibaw-an kon si kinsa yud ang gustong magpapili sa umaabot nga eleksiyon. Masayo ang pag-file aron mahashasan sa Commission on Elections (Comelec) kon si kinsa ang mga qualified ug aron ma-imprinta ang ilang mga pangalan sa balota kay computerized election naman kita karon. Mao nang unahon ang listahan sa mga official candidates.
Pero adto pa magsugod ang kampaniya sa sunod tuig. Ninety days ang gihatag nga panahon sa mokandidato sa pagka-senador. Samtang 45 days alang sa mga
local candidates sama sa kongresista, gobernardor, provincial board, mayor ug mga konsehal. Pero nahibawo naman ta nga niadto pang miaging buwan nagsugod na og kampaniya ang uban. Dugay rang nag-pulong-pulong og handshaking.
Dunay pipila ka mga lugar dinhi sa Metro Cebu ang posibling mamahimong alegre o init ang piniliay. Sama sa probinsiya alang sa pagka-gobernador. Kini human mikonpirmar si third district Congresswoman Gwen Garcia nga magpapili sa pagka-gobernador batok ni Gov. Junjun Davide. Mao ni gihula way sa uban nga “battle
royale”. Dinhi nato masukod kon kinsa yud ang paburan sa mga Sugboanon.
Dinhi sa dakbayan sa Sugbo mao sab sa gihapon. Mamahimong init ang panagsangka nila ni Vice Mayor Edgardo Labella ug ingon man aning “kanhi laos nga pulitiko.” Dinhi usab nato masukod kon si kinsa ang paburan sa mga botante ning dakbayan. Ang kasamtangang mayor kansang batasan dili maka-on og iro ug may pagka-diktador ug arrogante. O ang usa ka tawong ligdong, de prinsipyo ug malantip ang huna-huna ug mapahiubsanon.
Sa dakbayan sa Mandaue mao usab. Battle royale pod tali nila ni Mayor Luigi Quisumbing ug 6th district Congressman Jonas Cortes. Ambot og unsa
yuy balikan ni Jonas nga kongresista naman unta siya? Gani sa pagkakaron pa lang nga wala pa gani magsugod ang kampaniya, medyo init na man ang pulitika sa Mandaue. Ambot kinsay mokontra ni Lolipop Ouano Dizon sa pagka-kongresista, kinsa kaalyado na karon sa kampo ni Cortes. (bobbygnalzaro@gmail.com)