Gamhanan sad si Gabriel
Nag-estoryahanay ang tulo ka mga higala sud sa classroom. Nag-iyahay og pasikat sa ilang kaugalingon kay lagi mga anak og adunahan nga may ngalan sa katilingban.
“Kitang tulo maoy labing gamhanan dinhi sa tulonghaan. “Pasigwar ni Samuel. “Mga anak gud tag mga dagkong tawo sa katilingban, di ba, mga parts?”
“Tinuod na, Sam,” mitubag si Mamer nga utro sad nga hambugiro.
“Kini si Bobby maoy labing gamhanan nato kay gobernador ang erpats,” matod ni Sam. “Ang akong Daddy city mayor man lang.” Igo lang mipahiyom si Bobby nga mipakli sa iyang libro.
“Di pulitiko ang akong amahan pero maoy bantugang heart surgeon sa Pilipinas.” Pasiatab ni Mamer nga nagpasiklap sa puting tuhod ni Miss Violeta Arong, ang batan-ong magtutudlo sa Physics nga labing guwapa sa mga magtutudlo sa ilang tulonghaan nga bisi kaayog suwat sa mga grado sa iyang class record samtang naglingkod sa iyang lamesa.
Nilang tulo, si Bobby ang hait sa pangutok ug kontrolado kay di tigpasigwar sa iyang pagkabutang. Miagi si Gabriel, ang diyanitor, nga ilang kasaring nga nagdag pungpong sa pulang mga rosas.
“Hoy, mosimos, asa na nimo dad-a?” Singgit nga pinugngan ni Mamer.
Milingi si Gabriel nga mihana pagpahiyom. “Nagpasugo si Ma’m Arong nako pagkutlo sa campus garden.” Miduko si Gabriel kay siga kaayo og mata si Mamer.
Naibog sa hilom si Mamer sa ilang maestra sa Physics. Kon hunahunaon maguwang lang nilag gamay si Miss Arong. Suma sa sulti-sulti wa pa kunoy uyab ang dalaga.
“Mga Parts, di ta modaugdaog og tawo kay way seguro na si Gabriel nga molampos pa kay kanato kay bright.” Gitan-aw ni Bobby ang diyanitor nga mipahimutang sa mga buwak sa dalag nga plorera sa magtutudlo nga nagpahiyom kang Gabriel.
Usa ka adlaw niana, gipasidunggan sa tulonghaan si Gabriel kay giuli niya ang dakong kantidad sa kuwarta ug tseke nga balor og one million dollars sa pitaka nga nabiyaan sa usa ka American visitor. Agig ganti gihatagan siyag full scholarship sa bisan asang kolehiyo nga siya motungha sa Amerkano nga usa diay ka businessman-educator sa Estados Unidos.
Sa high school graduation kay kinatas-ag grado si Gabriel ang valedictorian nga gisundan ni Bobby. Napikal pag-ayo si Mamer nga nakakita nga mihawok si Miss Arong kang Gabriel nga napuno ang dughan sa mga medalya sa pasidungog.
PAGLAKANG sa panahon nahimong civil engineer si Gabriel Brillantes nga nagmalampuson sa constructon business. Sa class reunion nanambong sila si Sam, Mamer ug Bobby.
Sa iyang pakigpulong gipasalamatan ni Gabriel ang tulonghaan diin siya nag-working student. Mingpakpak ang tanan niyang mga klasmeyt ug kanhi mga magtutudlo nga wa pa mo-retiro. Misamot ang kalanog sa mga pakpak dihang gipaila niya ang iyang kapikas sa kinabuhi nga mao si kanhi Miss Violeta Arong.
Gipikpik ni Bobby sila si Sam ug Mamer. “Tan-awa, mga parts, gamhanan sad diay si Gabriel tungod sa iyang kamatinud-anon ug kalag-it sa pangutok!”’
“Sa kabuotan sad,” ni Sam nga mipakpak pagkusog paghumag diskurso ni Gabriel. Samtang si Mamer way tingog nga nagtutok sa puting tuhod ni Mrs. Violeta Brillantes nga wa gyud maunsaay bisan sa kamot ni Gabriel. Bisan minyo na si Mamer, di gyud diay malarag ang kalaa sa first love nga iyang gibati karon nga mihakop sa iyang dughan. (KATAPUSAN)