Suerte andam moduwa sa MPBL, D-League
Andam moduwa ang pambato sa University of the Visayas (UV) Green Lancers Rey Anthony Suerte sa Maharlika Pilipinas Basketball League (MPBL) sa higayon nga mahuman na ang iyang pag-eskuwela sa kolehiyo.
Kini maoy gibutyag sa 24-anyos nga taga Compostela province, Davao atol sa iyang pag-guest sa bag-ong sports program “Sports ta Bai” live sa Facebook page sa Superbalita niadtong Martes.
“Kon dunay mo-offer natural, opportunity na man na,” matod ni Suerte kinsa wala usab mosalikway sa posibilidad nga motabok sa D-League didto sa Kaulohan.
Nasayran usab sa Superbalita nga interesado si coach Norberto “Titing” Manalili sa Cebu City Sharks-Casino Enthyl Alcohol ni Suerte apan tungod sa patakaran sa MPBL dili una kini nila makuha alang sa nagpadayon nga season.
“Duna man guy rules sa MPBL nga dili ta dalidali makakuha basta dili atong homegrown ba, so sa sunod tuig ato siyang iapil,” matod ni Manalili.
Si Suerte, ang kanhi most valuable player (MVP) sa 2016, gikatakdang mograduwar na sa kursong Human Resource Management (HRM) sa karon nga semester.
Sa kasamtangan, ang paghatag sa ikatulong sunodsunod nga titulo maoy iyang gitutukan karon.
Ang Lancers maoy no. 2 team human sa elimination round sa nagpadayon nga Cesafi men’s basketball sa Cebu Coliseum diin ilang naangkon usab ang twice-to-beat nga bintaha.
Kauban ni Suerte nga miguest sa Sports ta Bai, ang 20-anyos nga si Michael Maestre.