EX-IMPORT SA UV AKOMO NA-ICU?
Apan tinubdan nagkanayon nga na-ospital ra ang bigman
Gikataho nga nahidangat sa intensive care unit (ICU) ang kanhi import sa University of the Visayas (UV) Lancers nga si Steve Akomo tungod sa blood clot sa iyang utok
Si Akomo kinsa atoa na karon nagbasehan sa Manila ubos sa Univesity of Sto. Tomas (UST) Growling Tigers, ang wala na makaduwa sulod sa duha ka higayon sa UAAP men’s basketball.
Kini tungod kay sa kasamtangan anaa pa siya sa UST Hospital diin gikataho nga hinayhinay na kining nagpaalim human sa operation aron pagkuha sa dugo nga nibagtok sa iyang ulo.
Hinuon, pabilin pa kining under observation sulod sa pipila pa ka mga adlaw.
Sa sinugdanan, gituohan nga ang Nigerian basketball player naigo sa food poisoning apan nabantayan nga nagk- agrabi ang sitwasyon niini.
Sigon sa pakisusi sa The Varsitarian, ang pagkaangol ni Akomo nagagumikan sa binanggaay nila ni Papi Sarr sa Adamson University atol sa ilang duwa niadtong Septiyembre 22.
Bisan pa man niini, nakaduwa gihapon siya niadtong higayona ug ingon man sa ilang pagpakigsangka sa Ateneo de Manila University sa sunod nilang duwa.
Pero ang kasaligang tinubdan sa Superbalita, nagbutyag nga dili tinuod nga na ICU si Akomo. Sa usa ka text message nga gikan sa girlfriend ni Akomo nagkanayon nga na-admit si Akomo sa hospital apan padayon pa kining giobserbahan kon anaa pa ba ang nabantok nga dugo apan posibling madala ra kini sa tambal.
Si kanhi UV asst. coach Van Halem Parmes mibutyag nga iyang nahinabi si Akomo ug mihimakak kini nga nahidangat siya sa ICU.
Hinuon giangkon niini nga obserbahanan pa siya sulod sa duha ka semana samtang padayon kining nagtumar sa mga tambal.
Si Akomo nakaduwa sa UV sulod sa tulo ka tuig sugod niadtong 2013. Iyang nagiyahan ang Lancers ngadto sa kampiyonato sa 2014 ug nakaduwa pa kini og usa ka tuig sa Lancers.
Ubos sa UST, si Akomo nag-average og 9.8 points ug 9.5 rebounds sa upat ka duwa sa karon nga season sa UAAP.