GWEN GARCIA MI-FILE NA PAGKA GOBERNADOR

SuperBalita Cebu - - FRONT PAGE -

Magsuong Garcia nga silang Kongresista Gwendolyn ug Atty. Pablo John ningduso sa ilang tagsa-tagsa ka mga certificate of candidacy (COC) alang sa pagka-gobernador ug pagka-kongresista sa 3rd district.

Ang Commission on Elections (Comelec) niklaro nga wa pay balaod nga nag-regulate sa political dynasty.

Birthday luck maoy gituohan ni Kongresista Gwendolyn hinungdan nga gitumong niya ang pagduso og COC atol sa iyang birthday kagahapong adlawa.

Natumong sab kini sa kapistahan sa Nuestra Señora del Pilar, nga maoy gikuhaan sa second name ni Gwen nga Pilar.

Human sa duha lang ka termino pagka-kongresista sa 3rd district, magpapili siya’g balik pagka-gobernador sa Sugbo.

Una na siyang nakaserbisyo og tulo ka mga termino isip gobernador gikan sa 2004 hangtod 2013 (2004-2007, 2007-2010, 2010-2013).

Way babag alang kang Gwen ang pagduso og kandidatura bisan og nahukman siya sa Ombudsman nga dismissed sa serbisyo ug perpetually disqualified to hold public office.

Gibarugan niya nga way katungod ang Ombudsman pagdisiplina kaniya nga sakop sa Kongreso ug labaw na nga dili pa usab pinal ang maong desisyon.

Nidungan kang Gwen pagduso sa iyang COC ang iyang igsuon nga si Atty. Pablo John “PJ” Garcia.

Si PJ nakaserbisyo na pagka-kongresista sa 3rd district niadtong 2007 hangtod 2013.

Ang pamilyang Garcia usa sa mga inilang political clan sa probinsiya sa Sugbo.

Nahimong kanhi gobernador ug kongresista ang ilang amahan nga si Pablo Garcia.

Silang Gwen ug Pablo John giubanan sa ilang amahan ug sa lain nilang igsuon nga si suspended Barili Mayor Marlon Garcia pagduso sa ilang COC sa buhatan sa Cebu Provincial Comelec.

Sa magsuong Garcia nga niduso sa ilang COC kagahapong adlawa, si Gwen lang ang kasamtangang naghupot og elected position.

ALEX BADAYOS

■ MAGSUON: Sila si Kongresista Gwendolyn (tuo) ug iyang igsuon nga si manlalaban Pablo John Garcia (wala) dungan nga ming-file sa ilang certificate of candidacy kagahapon sa Commission on Elections (Comelec). Si Gwendolyn magpapili pagka gobernador atbang kang Gobernador Hilario Davide III, samtang si Pablo John magpapili nga congressman sa tersero distrito./

Newspapers in Tagalog

Newspapers from Philippines

© PressReader. All rights reserved.