P2.5 M danyos sa sunog sa bodega sa Mandaue City

SuperBalita Cebu - - BALITA - / Fe Marie D. Dumaboc - Correspondent, Mark Joven Igot - USJ-R Intern

Mokabat sa P2.5 milyones ang gibiling danyos sa sunog nga niigo sa usa ka warehouse sa Sitio Kagape, Barangay Paknaan, siyudad sa Mandaue, Huwebes sa gabii.

Nadawat sa Mandaue City Fire Department ang alarma sa sunog alas 10:21 sa gabii diin giisa kini sa second alarm.

Nadeklarar nga kontrolado ang sunog alas 11:22 ug kagahapon sa alas 8:35 sa buntag na hingpit nga na-fire out.

Gitug-an ni SFO1 Edgar Vergara, sa Mandaue City Fire Department nga ang warehouse, iya sa usa ka Richard Ng.

Gihimo kining bodega sa mga kahoy ug fabrics.

Inisyal nga nakuha sa kabomberuhan, gikan sa usa ka Miole Tristan, caretaker sa warehouse, nga Huwebes sa buntag giingong natumba ang poste sa Veco duol sa warehouse.

Giayo kini, ug nianang pagkagabii, gipasuwayan kang Tristan ang pagpa-on sa ilang main circuit breaker diha sa bodega.

Apan sa dihang na-on giingong mao nalang nadunggan ni Tristan ang buto sud sa bodega ug nakakita og spark sa ubos nga bahin sa duha ka andanang bodega ug nisunod na dayon ang pagkayo hangtud nga nakadaku.

“Under investigation pa gyud ang hinungdan sa sunog. But initially, according sa witness, a certain Miole Tristan, ang caretaker sa warehouse nga human naayo ang poste sa VECO, gipa-testing sa iya og on sa main circuit breaker, mao nalang dayon iyang nadungog pag-on ang buto sud sa bodega ug nakakitag spark sa ubos diin nagsugod ang kayo,” asoy ni Vergara sa SuperBalita Cebu.

Wa ra hinuoy natalang nakalas o naangol sa sunog.

Si Carla, 26, nga anaa nagpuyo sa guardhouse sa nasunog nga warehouse, dakong pasalamat nga wala malakip sa sunog ang ilang panimalay ug luwas siya kauban ang iyang pamilya.

“Salamat intawn ko bisag gamay ni akong Sto. Nino iya gyud tawng gipanalipdan akong gamayng payag kanang guardhouse namo, kaming tanan, duol ra kaayo sa kayo,” matod ni Carla.

Newspapers in Tagalog

Newspapers from Philippines

© PressReader. All rights reserved.