Kurapsyon ug drugas

Upat na sab ka mga kinabuhi ang nangakalas sa usa ka ambush sa dakbayan sa Talisay kagahapon. Ang hitabo posibleng drug-related kay ang usa sa mga napatay usa ka pulis nga nalakip sa narcolist ni Presidente Rodrigo Duterte. Mao lagi ni, normal na dinhi sa Cebu nga dunay patyon. Di normal dinhi kon way patay ang adlaw.

Tinuod, nangminos ang ubang mga krimen sama sa mga tulis ug kawat, ingon man rape. Apan ang mga kaso sa patay maorag rocket, misulbong og kusog.

Maora sab ni og usa ka tunnel nga sama sa way kinutoban, ngingit pa, way kahayag nga makita.

Kon gubat man kini sa drugas, di usab makita ang maayong epekto tungod kay ang shabu, way hubashubas. Nangamatay man tuod ang unang mga nangapil, apan daghan usab sa dagkong drug dealers ang bag-ong players karon.

Unsay may buot pasabot niini? Kini nagpakita nga di diay ang pagpatay maoy sulbad sa suliran sa illegal drugs.

Bisan gani ang pagtaral ug pagbilanggo sa mga durugista wa makasanta kay bisan mismo ang jails, maoy tinubdan sa mga drug transaction.

Ning anti-drug campaign, ilakip unta sa paglimpyo sa kagamhanan ang hiwi ug kurakot nga mga opisyal.

Kining mga ahensya sa kagamhanan, sama sa Bureau of Customs, Philippine Drug Enforcement Agency, Philippine National Police ug uban pang buhatan nga magamit sa pagpalusot og drugas dinhi sa nasod, kinahanglang pagatutokan usab og maayo, silhigan sa mga sagbot ug dangan aron malimpyo.

Kay bisan pa og pabanawon ang daghang dugo sa mga durugista hangtod mopuwa na og apil ang kadagatan, ang suliran sa illegal drugs magpabilin. Kini gung pangurakot og illegal drugs, sumpay ni og tinai. Kon di ni maputol, kawang ang kampanya ug nausik pa ang daghang kinabuhi.