IDOL 4 BOXING SA MINGLA, NOV. 10
Saktong binukbokay sa kumo ang masaksihan sa mga boxing aficionados ilabi na sa lungsod sa Minglanilla sa dihang ipahigayon karong Nobiyembre 10, 2018 ang Idol 4 boxing promotion sa Ala Boxing Gym diha sa Minglanilla Sports Complex.
Inabagan sa Island Premium Paints, pormal nga gilusad kagahapon ang Idol 4 pinaagi sa usa ka press conference sa St. Mark’s Hotel sa Queen’s Road, (Redemptorist church), dakbayan sa Sugbo.
Ang one-time world challenger nga si Melvin “Gringo” Jerusalem makigsinukliay sa iyang mga kinumo batok sa laing world title challenger nga si Toto “Muscovado” Landero sa 10-round non-title fight.
Base sa record, si Jerusalem (13-2,8KOs) nakaaway ni World Boxing Council (WBC) minimum weight champion Chayaphon Moonsori sa Thailand niadtong 2017 apan napildi pinaagi sa unanimous decision.
“Importante ni nakong awaya kay mao man ni mopataas sa akong ranking. Gusto ko nga mo-rematch ni Moonsori,” matod ni Jerusalem.
Si Landero, sa iyang bahin, kaduha usab ka higayon nga misuway paglangkat sa world title, apan pulos gisugat og kapakyasan, pinaagi sa unanimous decision.
Iyang gisuwayan paglabni ang World Boxng Association (WBA) minimumweight title ni Thammanoon Niyomtrong niadtong Marso ning tuiga apan napildi kini pinaagi sa unanimous decision.
Sa niaging Hulyo, iyang gikabagat si Simphiwe Khonco alang sa IBO title, apan sa gihapon napukan kini pinaagi sa unanimous decision.
“Mao ni nakanindot sa ilang away. Pulos duna silay experience sa world title fight unya pareha sab sila 15 ka away,” matod sa matchmaker sa Ala nga si Edito Villamor.
Mopakita usab og aksyon si Esneth Dominggo, laing produkto sa Ala Boxing Gym, nga makigsangka ni Reymark Taday sa Binan City, Laguna.
Laing way pildi nga si Christian Bacolod (9-0, 7KOs) ang makigsangka ni unbeaten Christoval Furog (5-0, 2KOs) sa 8 -round match. Laing upat ka away ang mokompleto sa kagabhion.