ONE CEBU MIPAKITA'G PWERSA SA PULITIKA

Nipakita og pwersa ug kahiusahan ang lima ka mga partido sa gipahigayon nga

grand convention sa Sugbo ug nituboy kang Kong. Gwendolyn Garcia isip kandidato sa pagka gobernador sa piniliay sa sunod tuig ug kompleto nga slate sa mga kongresista, mayor, bise mayor ug konsehal.

Ang mga pulitiko nga gikan sa tanang mga distrito, mga siyudad ug kalungsoran sa Sugbo, mga miyembro sa One Cebu, Lakas-Christian Muslim Democrats (Lakas-CMD), Partido Demokratiko Pilipino-Lakas ng Bayan (PDP-Laban), Nacionalista Party (NP) ug National Unity Party (NUP).

Samtang, ang Barug Alang sa Kauswagan ug Demokrasya (Bakud) Party sa ikalimang distrito sa Sugbo nakigalyansa sa Hugpong ng Pagbabago (HNP) nga gipangulohan ni presidential daughter

ug Davao City Mayor Sara Duterte-Carpio, butyag sa usa sa mga miyembro sa partido.

Gikompirmar ni Bise Gob. Agnes Magpale nga giingnan siya ni Kong. Ramon “Red” Durano VI sa panag-alyansa sa miaging semana ug iyang gitataw nga ang alyansa alang sa regional parties sanglit ubos gihapon sila sa Nationalist People’s Coalition (NPC).

Ang Bakud Party maoy ikaduhang lokal nga partido nga nagbase sa Sugbo nga nakig-alyansa sa HNP human sa Alayon Party sa mga Gullas sa unang distrito sa Sugbo nga nituyo og adto sa Davao City ug nakigkita ni Carpio alang sa maong katuyoan.

Sa iyang pakigpulong, si Gwen nisaad nga iyang igugol ang nahabiling katuigan sa pagserbisyo sa mga Sugbuanon.

Siya nisaway sa kasamtangang administrasyon ni Gob. Hilario Davide III nga giingong gipasagdan ang Sugbo nga kanhi numero uno sa dihang siya pa ang gobernador.