Love is a stranger
Niadtong gabhiona, dugay kong nakatulog. Ambot ba sab, uy, nga wa man ko mahimutang. Morag duna koy gihunahuna, apan wa ko makahibawo kon unsa gyuy tumong sa akong hunahuna. Nahunahuna ko si Rowan nga gikasal na ganinang buntag. Unya nahunahuna ko sab si Gabriel. Wa ko makasabot kon nganong naingon ko niadtong tungora. Aw, si Rowan di man kalikayan nga mahunahuna ko siya kay kabahin na man siya sa akong kinabuhi.
Apan si Gabriel, unsay labot niya sa akong kinabuhi nga nahunahuna ko man siya karon?
Naigpot ko dihang mitingog ang akong selpon. Usa ka text message. Pagsusi nako, si Rowan ang nagpadalag message. “I’m very very sorry, Jinky.” Ang kanahan, nangayo pag pasaylo nako. Gi-delate ko dayon ang iyang text message ug wa ko siya replayi. Gusto kong mawala si Rowan sa akong hunahuna. Di na ko angay nga hasulon ko pa ang akong kaugalingon niya. Wa na koy labot sa iyang kinabuhi.
Unya mikiring pag-usab ang akong selpon. Usa gihapon ka text message. Nagtuo ko nga si Rowan gihapon ang nagteks nako. Puwerte na gyud nakong lagota. Maoy diha sa akong hunahuna nga replayan ko si Rowan ug akong balikason. Akong kasab-an. Akong tungluhon.
Apan di diay si Rowan ang nagteks nako. Si Gabriel diay. Naghatagay na man gud mig numero sa among selpon ug among gi-save sa among phonebook.
“Good night.”
Mao ra kini ang message ni Gabriel. Ambot ba nga hilom man kong nalipay. Wa ko kapugngi ang akong kaugalingon sa pag-smile.
“Good night, too.” Gireplayan ko si Gabriel. Wa na siya moteks nako. Nagpahiyom kong natulog.
Pagka ugma, nagdungan mig pamahaw si Gabriel sa restawran sa hotel. Pagkahuman, nanuroy mi sa baybayon.
“You know, Jinky, motuo na gyud ko nga usahay stranger ning gugma.”
“Bitaw.”
Na, wa ko lang tuyoa nga nakatubag kog ingon niadto kang Gabriel. Unsaon, giisip ko mang stranger si Gabriel nako. Pero di ko mahimong masayop sa akong gibati. Nahigugma ko niya.
“Nakaingon ko ana, Jinky, because of my feeling to you now. Wa ko lang damha nga mahigugma ko nimo.”
Nagkatinan-away mi si Gabriel. Ug wa ko mosupak dihang iyang gikuptan ang akong kamot. (KATAPUSAN)