Adiyos, patria adorada
Naglalis ang iyang konsiyensiya. Nagtinubagay nga wa kapugngi sa iyang hunahuna. Ang usa nag-urosuros sa kainit, ang atbang giusap sa kabugnaw. Ang usa naningka, “Ambak na, Ricardo, aron madugmok ang imong kapakyasan!”
Ang atbang nga ang tingog giputos sa kaaghop mipadayag, “Ayaw, Ric, kay sala ang paghikog. Hunahunaa ang pagmahal sa imong ginikanan ug mga igsuon. Kana ang kawilihi ning kalibutan.”
“Ayaw pagtuo ana. Giyam-iran ka ug wa ilha bisan sa imong pangaliyupo. Gi- tan-aw ka nga hayop, maayo pang maghikog, Ricardo!” “Ric, hibaw-i, duna kay dakong tulubagon sa langit kon maghikog ka, ayaw gyud na buhata.”
“Buhata na, ambak, uy! Ayaw, pagpanuko aron maimpas ka, nganong magpakabuhi ka pa?”
Miisog si Ric sa hinay nga mga lakang padung sa ngilit sa titip nga pangpang. Gitutokan niya ang naglugitom nga kapunawpunawan nga mibad-as sa iyang mga mata. Gigapos ang iyang tinan-awan sa bagtok nga kangitngit nga midatom ngadto sa kinaubsan. Sa kalit may mibadlis nga kasanag buot mogisi sa kahilom. Miguho ang panagway sa linalang nga nagbiay-biay kaniya. Si Patria Adorada kinsa misalikway kaniya kay giluod sa iyang hitsura nga gihulma sa kangil-ad nga inahan ray makaan- tos sa pagsud-ong. Ambot nganong ingon siya ani?
“Unsa, ikaw manguyab nako? Magpatuka na lang ko sa halas!” Prangka sa babaye kaniya nga gipakapinan og kasiga sa mata. “Mousab pa gani kag esplikar, ipapatay tika, kangil-ad nimog nawong. animala ka!” Wa siya ibutang nga tawo ni Patria.
Nalusno siya sa gidudho nga kamatuoran sa kangil-ad sa iyang nawong. Di niya mabasol ang iyang mga ginikanan nga naghatag niyag kinabuhi. Ang langit nga di makiangayon.Siya gyud ang gitumong nga manghod lag gamay sa unggoy ang hitsura. Iyang mga igsuon mga maamyon lahi siya kanila. Mao kini karon nga ania na siya nangisog sa ngilit sa paghukom. Gisunod niya ang langgis nga tingog sa iyang pangisip. Bahala na nga masunog sa sulad!
“Adiyos na, Patria Adorada!” Miihap siyag katulo. Midungan siya sa pag-ambak sa katapusang numero nga gilitok sa iyang tingog. Apan may mibunlot sa iyang kuwelyo ug mitugpa siyag balik sa yuta nga nahimutangan niya kaganiha.
“Kabuang baya nimo, Ricardo, nga usikan mo man lang ang imong kinabuhi sa babayeng bakang nga ambisyusa nga mistisa lag ngan. Sapian mo, pagpa-Belo, uy!” Matod ni Usong. “Samang Sander Ford, ilugan ka gyud sa mga chicks!”
Gitan-aw niya ang iyang manluluwas nga may pagka libat ug kihod pa, apan madasigong nagpakabuhi bisan kabos. Nakamatngon si Ricardo. Mitindog siya. Nalantaw niya nga misanag pagkalit ang kapunawpunawan bisan hapon na. (KATAPUSAN)