Fuel subsidy

Gawas sa regular nga mga adlaw sa distribusyon, nitagana og duha ka adlaw ang Land Transportation Franchising and Regulatory Board (LTFRB) karong Biyernes ug Sabado, alang sa dungan nga pag-apudapod sa fuel subsidy cards sa tanang rehiyonal nga mga buhatan sa tibuok nasod.

Matod ni LTFRB 7 Director Eduardo Montealto Jr., nga tumong sa duha ka adlaw ang paghatag og panahon sa mga operator nga maoy nangunay og pamasahero sa ilang gipanag-iya nga public utility jeepney (PUJ) units aron makakuha na sa ilang cards.

Usa sa nakita nga hinungdan sa director kon nganong minos pa lang ang nanguha sa Pantawid Pasada Program cards mao nga anugonan ang mga operator/driver nga mohunong og pamasahero sa mga adlaw sa tingklase ug tingtrabaho kay daghan og mga pasahero.

Ang LTFRB 7 pinaagi sa Land Bank of the Philippines (LBP) sa P. del Rosario Branch, dakbayan sa Sugbo, nagpadayon sa regular nga pag-apud-apod sa mga card sa mga adlaw nga Martes, Miyerkules ug Huwebes.

Apan nakita ni Montealto nga minos pa ang mga operator nga nanguha sa ilang cards nga matag usa dunay sud nga P5,000 nga fuel subsidy gikan sa gobiyerno.

Kini ang hinungdan nga mopahigayon og simultaneous nga distribusyon sa PPP cards sa tanang rehiyonal nga mga buhatan sa LTFRB sa nasod.

“Kasi ang iba hindi makapunta kasi Biyernes, weekdays, maraming mga pasahero. After that seguro kung mataastaas na pwede na seguro naming i-request yung sunod na batch,” pahayag ni Montealto.

Hangtod sa Biyernes sa miaging semana, kapin pa lang sa 1,900 ka cards ang nakuha sa mga operator sukad gisugdan ang distribusyon niadtong Agusto.