SUGBO LUWAS: KOREAN CONSUL
Ang Korean Consul General sa Sugbo wala mabalaka sa sunodsunod nga patay sa mga nalambigit sa ilegal nga drugas sa siyudad ug lalawigan sa Sugbo sanglit mibati pa gihapon sila nga luwas ang ilang kinabuhi tungod sa presensya sa kapulisan.
Naila nga ang mga Koreano maoy labing daghan nga bisita sa Sugbo ug tibuok Central Visayas (CV).
Si Korean Consul General sa Sugbo, Oh Sung Yong Tong, nagkanayon nga ang mga nalambigit sa ilegal nga drugas namatay sa gihingusgan nga anti-drug campaign ug wala kini makabalda sa pagbisita sa ilang mga Koreano.
“The Cebu area is okay because it’s safe here and we try to explain to them (Korean tourists) that the tourists are safe in Cebu. This year two Korean people were victims of murder but the suspects were arrested quickly,” matod ni Tong.
Ang pamahayag sa Korean government official gikalipay ni Chief Supt. Debold Sinas, direktor sa Police Regional Office (PRO) 7.
Gipasalig niini nga ilang hatagan og seguridad ang Korean community.
Gihimakak usab niya ang pamahayag sa mga negosyante sa Sugbo nga nabalaka na sila sa ilang seguridad human sa kamatayon sa lima ka mga tawo sa Barangay Malubog nga gihulagway sa maong grupo nga dili na luwas nga puy-an ang Sugbo.
Tungod niini, dunay umaabot nga panagtagbo sa business sector atol sa Regional Advisory Council.
Padayon gihapon ang suporta sa mga negosyante sa Sugbo gani, nisaad pa kini nga mohatag sila og financial assistance ni- adtong mga pulis nga nag-atubang og kaso sa korte tungod sa ilang pagsebisyo sa publiko.
“We’ll be connecting sa ilaha we will be discussing sa ilaha kung unsay ilang mga concern, I don’t think so nga mabalaka sila kay wala may gipatay diri nga outright,” matod ni Sinas.
Gipasalamatan ni Sinas ang kagamhanan sa Korea sa gihatag nga donasyon dungan sa saad nga ila usab nga bantayan ang mga bisitang Koreano ug Korean community.
Midonar ang Korean government og 25 ka mga bagong sakyanan sa PRO 7 nga gipang-apud-apod sa police stations sa siyudad sa Sugbo, Mandaue ug Lapu-lapu.
Gawas niini, gipasidunggan usab ang mga Korean national nga nakatabang sa pagpatunhay sa kahusay sa ilang komunidad lakip na ang mga pulis nga nakasikop sa mga nagpatay sa tulo ka mga Koreano.