4-cornered fight sa mayor sa Lapu
Opisyal nang gianunsiyo ni Pajo barangay kapitan Junard “Ahong” Chan ang iyang tinguha nga magpapili pagka-mayor sa Dakbayan sa Mandaue ubos sa partido PDP-Laban.
Samtang, gikonpirmar pinaagi sa text message ni Engr. Rolando Patalinjug ang iyang pagpapili sa susamang posisyon sa partido United Nationalist Alliance (UNA).
Tungod niini, mahimong four-cornered ang away sa pagka mayor sa Lapu-Lapu City kay si kanhi kongresista Arturo “Boy” Radaza maoy modagan hulip kang Mayor Paz.
Atol niining pagsuwat base sa record sa Commission on Election (Comelec) Lapu-Lapu, adunay usa ka kandidato pagka-mayor ang miduso sa iyang certificate of candidacy nga independent candidate nga si Virgilio dela Cerna Cano, 57, taga-Barangay Pusok.
Si Chan, sa iyang bahin, namahayag nga ang iyang pagdagan sigun sa kamanduan ni Presidente Rodrigo Duterte gumikan sa iyang agresibo nga kampaniya batok sa illegal drugs nga iyang gipatuman sa iyang barangay ingon man sa iyang pakigbatok sa kurapsiyon.
“Di kapugngan ang katawhan nga nangandoy sila og kausaban. Mao na akong gidawat ang maong hangyo sa mga tawo para sa kausaban sa dakbayan sa Lapu-Lapu,” pamahayag sa kapitan.
Sa mga konstituwente nga ilang nakonsulta, gusto nila nga mapatuman o mapalapdan sab ni Chan ang iyang programa nga gipatuman sa Pajo, sama sa paghatag og libre nga serbisyo.
Ang Barangay Pajo adunay programa nga naghatag og libre nga medical check-up, ibot sa ngipon, training sa livelihood, barangay clearance, paggamit sa E-Library ug printing lakip na ang bondpapers.
“Ninety percent nangandoy gyud sila nga ma-ilisan ang pamunoang Radaza tungod kay sulod sa 18 ka tuig (pagdumala sa city hall), wa nila makita… ang problema nga wa maresulbar,” matod pa ni Chan.
Gitumbok sab sa kapitan nga pabilin nga wa mo-asenso ang isla sa Olango ilabi na sa panginabuhian sa pasangil nga gipahimuslan ang ka-pobre sa mga lumolupyo aron padayon magaw-ngan sa administrasyon.
Mao kini ang kompletong nga line-up sa partido PDP-Laban / Team Libre: Bise Mayor ni Chan si Dr. Celedonio Sitoy, Congressman – Atty Eugene Espedido, Councilors naglangkob nila ni Josie Hayashi, Climaco “Montor” Tatoy Jr., Joy Morales, Celestino Aying, Atty. Ferdie Dungog, incumbent City Councilor Nelson Yap, Jun Alforque, Dr. Emilio Galaroza Jr., Janvi dela Serna, Atty. Susan Baring, Francisco Gilig ug Kim Francisco.