BOPK miduso sa ilang COCs

Niduso na sa ilang certificate of candidacy (COC) ang tanang kandidato sa Bando Osmeña Pundok Kauswagan (BOPK) gawas lang ni Konsehal Dave Tumulakngadto sa Commission on Elections (Comelec).

Ang BOPK nga gipangulohan ni Mayor Tomas Osmeña kinsa subling magpapili sa posisyon diin iyang running mate si Konsehal Mary Ann de los Santos, nipahigayon una sila og misa didto sa San Pedro Calungsod Shrine sa South Road Properties.

Nisang-at na usab sa ilang COC silang Kongresista Rodrigo Abellanosa sa south district ug Kongresista Raul Del Mar sa north district.

Si Tumulak nipasabot sa mga tigbalita nga wala siya makauban sa BOPK sanglit ang iyang certificate of nomination and acceptance (CONA) gikan sa iyang national party wala pa naabot.

Iyang gipasabot nga lahi ang iyang partido sa gipasilungan sa BOPK kinsa nitapon karon sa Laban ng Demokratikong Pilipino (LDP) gikan sa Liberal Party ni kanhi Presidente Benigno Aquino III ug Mar Roxas.

Ikaatbang ni Osmeña sa pagka-mayor mao si Bise Mayor Edgardo Labella sa Barug PDP-Laban kinsa maoy kaalyado sa ruling party ni Presidente Rodrigo Duterte samtang iyang running mate mao si kanhi Mayor Michael Rama atbang ni de los Santos.

Ikabangga ni Abellanosa kinsa anaa na sa iyang ikaduhang termino mao si Konsehal Joy Pesquera samtang sa north district mo-atbang kang del Mar mao si Richard Yap.

Si Del Mar, sa iyang bahin, niingon nga si bisan kinsa mamahimong magpapili sa posisyon ug iya na lang gitugyan ngadto sa katawhan kon si kinsa ang buligan sa ilang boto sa umaabot nga eleksiyon.