Cortes, Bercede mingduso na sa ilang COC sa Comelec

Kampo nila ni sixto distrito kongresista Jonas Cortes ang unang nakaduso sa certificate of candidacies (COC) sa Mandaue City Comelec niadtong Huwebes sa miaging semana.

Atol sa iyang diskurso atubangan sa ilang mga dumadapig, pasiunang pasalig ni Cortes ang pagtabang niadtong job-order (JO) employees nga nawad-an sa ilang trabaho.

Apan Mandaue City Bise Mayor Carlo Fortuna namahayag nga wa matarug ang ilang kampo ni Mayor Luigi Quisumbing sa giingong power team sa kaatbang.

Sa pagbukas sa Mandaue City Comelec kagahapon sa buntag, anaa na dayon ang tibuok slate sa kampo ni Cortes kinsa sa iyang gidusong COC, nibalik kini pagpapili pagka mayor sa Manduae.

Uban ni Cortes ang iyang running mate nga kasamtangang Provincial Board member Glenn Bercede.

Dungan nga niduso ang line-up alang sa pagka konsehal nga sila Nerissa SoonRuiz, Cynthia Cinco-Remedio, Maline Cortes-Zafra, Malcolm Sanchez, Carmelino del Mar, Atty. Joel Seno, Cesar Cabahug, Jimmy Lumapas, Andreo Incalina ug Jun Arcilla.

Samtang ilang kongresista, si Emmarie ‘Lollipop’ OuanoDizon. Ug mga board members, magpasubli si Thadeo Jonkie Ouano, ug bag-ong kauban niini nga si Glenn Soco.

Ang ilang kampo niduso sa ilang COC, diin ang Certificate of nominations and acceptance (CONA) gikan sa PDP-Laban, ubos sa One Cebu ni Cong. Gwendolyn Garcia kinsa magpapili pag-usab nga gobernador sa probinsya sa Sugbo.

Diha sa ilang pagduso, giunhan kini sa usa ka santos nga misa, anaa usab ang gatusan nila ka mga supporters kinsa nikuyog sa gawas sa Comelec office, hangtud na sa Norkis park, diin gihimo ang gamay’ng pagdiskurso sa ilang kampo ni Cortes.

Usa sa gihimug-atan ni Cortes nga ibalik ang saunang Mandaue City, ilabi na sa pamaagi sa paghatud sa serbisyo ug sa mga proyekto.

Iya usab gisaysay nga kahatagan og balik og trabaho ang 800 ka mga JO nga wa na gi-renew ang kontrata sa administrasyon ni Mandaue City mayor Quisumbing.

Samtang igo lang usab nakatawa si Fortuna sa pamahayag sa kampo nila ni Cortes nga balikon ang kaniadtong Mandaue City, nga iyang gihulagway nga daghan sa mga empleyado sa City hall kaniadto ang kurap, mga tawo magpataka’g labay sa basura ug traffic enforcer nga mamili sa ilang dakpon.