Pulitika sa lalawigan

Hugot nga gibantayan ang kalamboan sa pulitika sa lalawigan sa Sugbo tali sa duha ka mga higpit nga magkaatbang nga partido ning besperas sa kataposang adlaw sa pagpangdawat sa Certificate of Candidacy (COC) sa Commission on Election (Comelec). Si Cebu 3rd District Rep. Gwendolyn Garcia sa One Cebu naka-file na sa iyang COC sa miaging semana apan nagpabiling tanghaga hangtod kagahapon kon si kinsa ang iyang running mate o bise gobernador. Dunay daghang hugonhugon bahin sa iyang bise apan walay kompirmasyon hangtod nga makapasa sa ilang COC.

Sa habig ni Gobernador Hilario Davide III, wa madayon ang gitakdang pag-file sa iyang COC kagahapon tungod sa giingong nagpadayon pang negosasyon tali ni Bise Gob. Agnes Magpale, kinsa buot nang mopahuway sa pulitika? Apan sa kadugay sa ilang sabotsabot, dili kaha mabali ang sitwasyon? Si Magpale na maoy maggobernandor ug si Davide mokanaug sa pagka bise gobernador? Dili kini layo ang posibilidad.

Kon mahitabo ang maong hugonhugon, si Davide sama sa niangkon nga huyang ang iyang liderato o walay nahimong kalamboan sa Sugbo. Makatugot kaha siya? Dili kini paborable nga imahen. Ug kon mahitabo, mao seguro kini unang higayon nga modaug ang running mate ni Gwen, matod pa.

Apan mga hugonhugon lang kini. Masayran ning adlawa kon unsay tukmang kamada sa partido nga Liberal Party (LP) sa lalawigan. Namahayag kagahapon si Davide nga karon na siya moduso sa iyang COC.

Ang pipila nga magpapili sa Hunta sa Lalawigan naka-file na sa ilang COCs uban sa representante sa pito ka congressional districts sa Sugbo. Ugma molugdang na ning tanang hugonhugon, kon walay paglugway sa tagal sa filing sa COC.

Sa pagkakaron, dili na kapugngan ang kainit ug pagbukal sa kawa sa pulitika sa Sugbo, ang nag-unang lalawigan sa nasod.