Mibukal na ang kawa sa pulitika
Mi-level up si Barili Councilor Julie Flores. Gikan sa pagka-ordinaryong empleyado, nahimong mini-bus operator. Unya nanimpalad sa pulitika pinaagi sa pagdagan og kapitan sa barangay Patupat, Barili. Niadtong 2016 elections, nanimpalad pag-usab pinaagi sa pagdagan og pagka-konsehal diin siya nagmalampuson gihapon. Ug karong 2019 elections, manimpalad na usab si Konsehal Flores sa pagka-bise mayor sa Barili. Siya ang runningmate ni kanhi mayor og karon Bise Mayor Terisito “Undo” Marinas. Mi-file na ang ilang grupo sa ilang certificates of candidacy kagahapon. Good luck, Vice.
KAMADA SA PULITIKA
Naporma na ang line-up sa duha ka mga dagkong partido dinhi sa dakbayan sa Sugbo, ang Barug-PDP Laban nga gipanguluhan ni Vice Mayor Edgardo Labella ug Bando Osmena Pundok Kauswagan (BOPK) nga gipanguluhan sa “kanhi laos nga pulitiko.” Si Labella ug Mike Rama maoy mag-tandem samtang ang incumbent mayor ug si Konsehal Mary Ann Delos Santos ang mag-uban usab.
Tan-awa ra ning pulitika. Si Mike ug Mary Ann mao ang nag-uban sa partido kaniadto. Si Mike maoy nag-recruit kang Mary Ann nga maapil sa iyang line-up sa pagkakonsehal sa north district. Apan sa dihang nakalingkod na sa konseho ug gitanyagan sa BOPK, kalit lang mibalitok ug nakig-abin na si Mary Ann sa iyang kaatbang.
Sus, gilamoy ni Mary Ann ang iyang garbo aron lang makab-ot ang iyang ambisyon sa pulitika nga dalang panguwarta. Tiaw ba nimo kanang gi-apil pa sa “kanhi laos nga pulitiko” og ataki ang iyang amahan nga masakiton. Gibiay-biay siya ug gibuong ang iyang kadungganan. Karon ang tawo nga maoy nagdaot kaniya mao na hinuon ang iyang gi-ampoan ug alagaran.
Unya ang naka-porke pa gyud kay ang tawo nga maoy hinungdan nga nakalingkod siya sa konsiho mao na usab ang makontra niya sa pagka-bise mayor. Atong huwaton kon unsa ang mga ataki ni Mary Ann batok kang Mike kinsa maoy na-utangan niya og kabubut-on. Mao ni gi-ingon lagi nga sa “pulitika walay permanenteng amigo og walay permanenteng kaaway. Ang permanente mao lang gyud ang personal nga interest sa mga pulitiko.”