Mary Ann batok ni Mike?

Laing battle royale kining bugno nilang Konsehal Mary Ann delos Santos ug kanhi mayor Mike Rama alang sa pagka bise mayor sa Syudad sa Sugbo.

Tan-awon nato kon mabuntog ba ni Mary Ann, nga dunay solido nga suporta gikan sa labing dako nga barangay sa amihanang distrito sa Syudad sa Sugbo, ang giingong kusog nga suporta sa habagatan ni Mike labi na sa Basak-San Nicolas.

Importante alang sa Bando Osmeña Pundok Kauswagan (BOPK) nga modaog si Mary Ann aron kaalyado ang kahimong lider sa Konseho. Kadakong labad ni Mayor Tomas Osmeña kon ang iyang bise mayor mao si Mike.

Sa laing bahin, gikinahanglan ni Bise Mayor Edgar Labella ang dakong mayoriya gikan sa habagatang distrito sa Siyudad sa Sugbo aron matimbang ang iyang mga boto nga makuha sa amihanang distrito.

Sa mga kandidato alang sa pagka kongresista ug konsehal, ubay-ubay ang mga napruweba na nga mga pangalan sa listahan sa BOPK ug Barug PDP-Laban.

Apan mas daghan ang mga bag-ong pangalan sa BOPK diha sa habagatan.

Sa habig sa Barug Team Rama, hinaot nga ila nang naresolba ang kahimtang ni Rama sa pagkakaron. Wa pa man gud siya nakalingkawas sa pasangil ni Presidente Rodrigo Duterte nga siya usa ka druglord protector.

Nahimong kataw-anan ang kanhi mayor nga magsigi na lang og drug test nga ang iyang problema mao man ang paghingan kaniya nga usa ka druglord protector.

Kay nganong naghurar-hurar man gud siya kang anhing Rolando Espinosa sa Albuera, Leyte? Unya, uban pa niya sa maong hulagway mao si anhing atorni John Ungab.

Di ba bakikaw alang sa PDP-Laban, ang partido sa presidente, nga mohatag og certificate of nomination and acceptance kun cona kang Rama? Di ba ulahi na sab karon? Kon ipugos ang pagpapas sa iyang ngalan gikan sa giingong drug list isip usa ka drug protector, moguwa nga political accommodation lang gyud diay kay gikinahanglan sa PDP-Laban ang lig-on nga kandidato. Hinuon, mahimo mang makakuha si Rama og certificate of nomination and acceptance (Cona) gikan sa UNA party. Apan kining iyang kapakyas nga makalingkawas sa listahan ni DIgong mahimong bug-at nga isyu nga sama sa dakong krus nga iyang pasanon padung sa Mayo 2019.

Alcover

Kon tinuod nga dapig kang Presidente Duterte kining PDP-Laban chapter sa Syudad sa Sugbo, unta ilang mapahilom sab si Konsehal Jun Alcover sa mga tirada niini.

Kon maminaw kita kang Konsehal Jun, mas makaingon pa ta nga siya ang oposisyon sa Duterte administration dinhi sa Syudad sa Sugbo. Apan kaalyado siya sa PDP-Laban.

Si Mayor Tomas Osmeña wa mobawos sa iyang higala nga si Presidente Duterte. Di siya pareho kang Alcover nga grabing nakasaway sa presidente.