Don’t hurt my pride
Nagdali kong milabang sa pikas dalan kay nagtaligsik. Gikan kong nag-grocery sa usa ka Mall sa downtown. Gisugo ko ni Mama ganinang buntag. Gipadad-an ko niya daan og kuwarta aron inig gawas nako sa eskol karong hapon, mangompra ko para sa among konsumo sa balay.
Igo lang kong nakalabang mibundak ang kusog nga uwan. Maayo gani kay nakapasilong ko sa duol nga establishment. Nagsugod dayon pagbaha sa kadalanan. Nakapanglingo ko. Ma-estranded gyud ko ani, nakaingon ko sa akong kaugalingon.
Unya, wa ko lang tuyoa nga nakatan-aw ko sa duol nga snack bar. Nadiyong ang akong mga mata kay nakita ko sa sulod si Nick nga malipayon nga nag-esnak uban sa usa ka babaye. Nag-atubang si Nick nako. Nagkaatol sab nga milantaw si Nick sa lugar diin ako nagtindog. Nakakita siya nako. Mitindog siya ug nakigsulti sa kauban niyang babaye, nga sa akong pagtuo nananghid siya. Mitan-aw ang babaye nako. Puparehas lang siyag edad nako ug sa akong pagtuo estudyante sab siya.
Miduol si Nick nako. Nagsmile siya nga mikupot sa akong usa ka kamot. Gipasagdan ko siya sa iyang gibuhat kay boyfriend ko man siya. “Adto ta didto. Mag-esnak ta.” Nakatan-aw ko sa babaye nga nagpadayon pagtan-aw nako. Wa ko mosupak sa gusto ni Nick kay gusto sab nakong mahibaw-an kon kinsa ang babaye nga iyang gikakuyog karon, ug unsa kini sa iyang kinabuhi.
Wa dayon ko mohatag og konklusyon nga girlfriend ni Nick ang maong babaye.
Gipalingkod ko ni Nickk tapad sa babaye. Mipahiyom ang babaye nako. Aw, mibawos sab kog smile niya, para ipakita nga di ko bastos nga pagka babaye.
“Kining, Bel, si Nelia. Ug Nel, si Bella”
Naglamanohay mi si Nelia pagkahuman sa pagpaila-ila ni Nick namong duha. Mitan-aw ko kang Nick. Gusto kong makahibawo kon unsa sa iyang kinabuhi si Nelia. Morag nakasabot ang akong boyfriend sa dia sa akong hunahuna. Mitan-aw siya kang Nelia, unya mibalik siyag tan-aw nako. Ning higayona, seryuso si Nick.
Ambot ba nga kalit man kong gikulbaan. Morag namugnaw ang tibuok kong lawas. Mikupot si Nick sa akong kamot, samtang ang usa niya ka kamot mikupot sa kamot ni Nelia. Na, wa ko na gyud masabti ang pinitik sa akong kasingkasing.