Lions Club mitabang sa Naga City

Motabang ang Lions Club International (LCI) sa pagpatukod og mga balay alang sa apektadong mga pamilya sa pagdahili sa luna sa Barangay Tina-an, dakbayan sa Naga.

Niadtong Sabado, atol sa panagtagbo sa mga opisyal sa kagamhanan sa Naga, gipahibawo ni Lions District 301 B2 Governor Jerry Joseph Lim ang katuyoan sa grupo nga motabang sa dakbayan sa pagtuman sa gisaad nga mga balay sa permanent relocation site sa 360 ka mga pamilya.

Si Lim kuyog sa ubang mga opisyal sa grupo ang nakigtigom uban nila ni Ruth Rowena Alensonorin, executive assistant ni City of Naga Mayor Kristine Vanessa Chiong ug City Assessor Atty. Flordelis Ababa, kabahin sa plano nga pagpatukod og mga balay sa apektadong mga pamilya.

“We will wait until the LGU will come up with a concrete plan already on the type of houses or any other relocation plan so that we will know where can we, the Lions can come in,” nagkanayon si Lim sa press statement nga nadawat sa Superbalita Cebu.

Siya nanghinaut nga dili makasugat og problema sa ownership sa luna nga maoy gamiton sa lokal nga kagamhanan sa Naga alang sa relokasyon aron mas paspas ang pagtabang sa LCI.

Ang maong problema maoy nasugatan sa grupo sa siyudad sa Tacloban hinungdan nga nalangay ang paghuman sa pagpatukod og mga balay alang sa mga pamilya nga naapektuhan sa supertyphoon Yolanda.

Hinuon, hapin na mahuman ang P250 milyones nga kantidad sa 100 ka mga balay sa Lions Village nga gipatukod sa LCI sa Tacloban.

Gipasalig hinuon ni Alensonorin nga dili suliran ang pagpanag-iya sa luna nga gamiton isip relocation site sanglit ang Provincial Board sa Sugbo nidonar sa 2.3 ka ektarya nga luna sud sa Balili property.

Duha ka klase sa mga balay ang gitan-aw sa Naga City Government nga ipatukod: ang row houses ug mid rise condominium units.

“As of now, the mid rise condominium unit is being carefully considered in order to maximise the space,” sigon ni Ababa sa press statement.

Niadtong Sabado, nihatag og sayo nga Pinaskohan ang mga opisyal sa LCI ngadto sa kabataan ug mga hamtong sa Barangay Tina-an.

Pipila ka adlaw human sa landslide, ang LCI nanghatag og hygiene kits, mga sinina ug man nipakaon sa mga bakwit.

Nihatag usab sila og portable purifiers sa 20 ka mga dapit.

/ TAMPO NGA HULAGWAY ■ NAGA RELOCATION SITE: Si Lions district governor Jerry Joseph Lim nanginspeksyon sa Balili property alang sa posibling pagtukod og mga balay sa pipila ka evacuees sa dakbayan sa Naga nga apektado sa landslide.