Boxer, trainer nagkasungi?

Kadtong nahitabo ni Ezel Conde, partisipante sa 2018 Milo Marathon Cebu leg niadtong Dominggo, naghatag og dugang leksiyon sa mga organizers kon ang siguridad sa mga runners na ang hisgutan.

Si Conde, 22 anyos, mga tunga sa kilometro na lang ang latason, moabot na unta sa finish line sa Cebu City Sports Center ug posibling mahilakip pa siya sa Top 10 sa 10-K category.

Apan way suwerte kay didto na man hinuon siya motapos ug molandig sa hospital human siya maigo sa awto nga ambot og sa unsang pagkaunsa nga misubay man usab sa rota sa mga runners.

Diha kini mahitabo sa eskina P. del Rosario st. ug dalan D. Jakosalem pipila na lang ka metros padulong sa CCSC.

Samtang atong gikalawat nga dakong sayop sa nagmaniho sa sakyanan nga si Abel Racaza Tanjay, 19-anyos, di usab nato masalikway ang mga pangutana kon nganong nakalusot man ang maong sakyanan sa rota.

Asa na man diay ang atong mga marshalls, mga traffic enforcers o volunteers nga mao unta ang moabag sa seguridad sa mga partisipante?

Dili man tuod mohikling sa ilang tabang ang nagpasiugda ning maong tinuig nga kalihukan ngadto sa biktima nga si Conde, apan maayo sab siguro nga mohimo sila og imbestigasyon aron matun-an ang kakulangan ug malikayan nga masubli pa ang maong hitabo.

Kinahanglan usab palapdan ang information drive kon asang mga dalana ang maapektohan sa rota ug masirhan niining mga orasa.

Ila usab ikonsiderar nga walay sakyanan nga matanggong sa mga dalan nga apektado.

Hinuon sa kadaghan nga mga Milo Marathon nga gipahigayon dinhi sa Sugbo, ang kadto ra sa miaging Dominggo ang medio naduhigan og ingon atong hitabo.

Mora man og dunay kasikas karon nga mitumaw sa kampo sa Omega Boxing Gym nga naglambigit sa kasamtanang World Boxing Association (WBA) interim featherweight champion Jhack Tepora ug sa iyang bag-ong trainer nga si Julius Erving Junco.

Taodtaod na tang nakadungog niini pero wa dayon ta mosakay sa isyu kay internal ra man ni nila unya dako atong pagtuo nga masulbad ra sab dayon ni.

Apan mora man og nagumido sa kainit unya hinayhinay nang midako ug miulbo ang isyu tali sa duha

Nadalikyatan nato og basa ang gi-post ni Jhack nga daw og sa nagpahungaw sa iyang kaligotgot.

Wa man tuod mohsugot og pangalan sa iyang gi-post apan klaro ug tataw kon kinsay iyang gipasumbingayan.

Nahisgutan pa ni Jhack nga gipanabi kuno siya nga dili siya ma champion kon dili pa tungod sa iyang bag-ong trainer, butang nga gitubag usab ni Jhack nga makamao na siya sa boxing sa wala pa ang iyang bag-ong trainer.

Pastilan, atong panghinauton nga mahatagan unta ni og igong pagtagad sa top management ug masulbad kini nga way pagdumot ang matag usa.

Lisod na og molanat pa kini og hataas nga panahon ug tingali pa unya og makaapekto kini sa karera sa El Kapitan o kaha makaduhig sa pangalan sa kompaniya nga ilang gialagaran.