NIETES-IOKA TITLE FIGHT SUNOD TUIG?
Ang kontrobersiyal nga desisyon sa niaging away tali ni kanhi world champion Donnie “Ahas” Nietes ug sa kataginasod nga si Aston Palicte maoy usa sa mahisgutan sa umaabot nga World Boxing Organization (WBO) Convention karng Oct. 29 ngadto sa Nov. 2 sa Panama.
Si ALA Promotions president Michael Aldeguer motuki niini ngadto sa WBO aron ila nang plastada kon unsay sunod lakang nga ilang buhaton sa 36-anyos nga Nietes.
“Most likely it will be discussed during the WBO Convention at the end of this month,” matod ni Aldeguer sa dihang gikahinabi sa igsuon buhatan niining mantalaan.
Sa pagkakaron di pa gyud sila makaplano alang ni Nietes, ang three-division champion kinsa midominar ni Palicte sa kinatibuk-an nilang away didto sa The Forum sa Inglewood, California, apan surprisang natabla sa desisyon sa mga judges.
“We have no plans yet. We have to wait for the WBO,” said Aldeguer. “Most probably because it’s always the usual practice.”
Sa kasamtangan, si Nietes maoy No. 1 sa ranking sa WBO superflyweight division samtang si Palicte ang No. 2 diin pabiling bakanti ang titulo.
Apan daw sa dili na interesado si Nietes nga mo-rematch ni Palicte ug ang anaa karon sa listahan nga gusto niyang masangka mao sila si Roman “Chocolatito” Gonzalez, Juan Francisco Estrada ug World Boxing Council (WBC) super flyweight king Srisaket Sor Rungvisai.
Mitumaw usab ang hugonhugon nga ang Haponanon nga si Japanese star Kazuto Ioka ang posibling makontra ni Nietes alang sa kampiyonato ug ang modaog maoy isakbang ni Palicte. “We are looking at the first quarter of next year,” padayag ni Aldeguer kalabot sa sunod away ni Nietes.