DAVIDE MIDAILOS SA PAGKA BISE GOBERNADOR

Sila si Bise Gobernador Agnes Magpale ug Kongresista Gwendolyn Garcia ang magtigi sa pagka gobernador sa Sugbo sa 2019 elections human nipadailos pagka bise gobernador si Gobernador Hilario III.

Kagahapon, natuldukan ang mga spekulasyon sa posibleng “switch” sa mga posisyon nga daganan nilang Davide ug Magpale.

Kini human nga giduso na ni Davide sa Cebu Provincial Commission on Elections (Comelec) office ang iyang certificate of candidacy alang sa pagka-bise gobernador sa sunod tuig nga piniliay.

“My decision to run for vice governor and asking Vice Gov. Magpale to run for governor came without pain and reservation,” niingon si Davide.

Niining iyang pag-atras alang sa labing taas nga posisyon sa kagamhanan sa lalawigan, giklaro ni Davide nga di ang kahadlok kang Garcia ang hinungdan.

Matod ni Davide, lakip sa nakapaaghat kaniya pag-slide down ug paghangyo kang Magpale nga maoy magpapili pagka-gobernador mao ang giingong “pag-pressure” sa kaatbang nga partido sa ila unta nga mga supporter.

Sigun sa gobernador, daw sa gihulga ang ilang mga kaalyado unta nga mga local officials aron mobali sa ilang suporta.

Nagtuo si Davide nga ma-undang lang ang maong pressure kon si Magpale ang makalingkod pagka-gobernador sanglit may koneksiyon man siya sa Malacañang isip “paryente” sa presidente.

“President Duterte has a soft heart for the vice governor,” pasabot ni Davide.

DI TINUOD

Apan si Garcia, sa iyang bahin, nanghimakak sa mga alegasyon ni Davide nga dunay mga mayor nga gi-pressure aron motapon kaniya,

“I think it is an insult to the mayors to suggest that they succumb to pressure,” sulti ni Garcia sa mga reporter kagahapon.

Matod ni Garcia nga ang pangangkon ni Davide usa ka smokescreen sa dakong isyu sa administrasyon karon nga mao ang kapakyas sa liderato sa Lalawigan.

Sa pagka-karon, wala pa’y klaro nga kaatbang si Davide pagka-bise gobernador sanglit wala pa may running mate si Garcia nga nakaduso og COC sa Comelec.