DRUG LIST IPAGAWAS

GUSTO NI SINAS NGA IBUTYAG SA DILG KINSA SA MGA KANDIDATO NAAPIL

Ang Police Regional Office (PRO) 7, Dangerous Drugs Board (DDB) ug Philippine Drug Enforcement Agency (PDEA) 7 nagkauyon sa panginahanglan sa pagpagawas sa narco list ni Presidente Rodrigo Duterte.

Apan alang sa PRO 7, gikinahanglan nga ang Department of Interior and Local Government (DILG) maoy mopagawas sa listahan aron magiyahan ang katawhan sa pagbotar sa 2019 elections.

Niadtong miaging semana, ang DILG nagtinguha nga ilang iduso sa Commission on Elections (Comelec) ang listahan sa mga pulitiko sa nasod nga giingong nalambigit sa illegal nga drugas.

Kini aron ang Comelec na ang mohukom kon angay ba nga i-disqualify ang maong mga kandidato ug di na mamahimong makasalmot sa eleksyon sa sunod tuig.

Ang hepe sa PRO-7, Chief Supt. Debold Sinas way pagsupak niini aron masayod ang mga botante kinsa ang mga nalambigit sa illegal nga drugas.

Sa impormasyon sa PRO 7, aduna pay 85 ka mga pulitiko nga naa sa listahan nga protector o ang uban niini nalambigit sa pagpamaligya sa illegal nga drugas sa tibuok nasod.

Kon ihinayon sa DILG ang pagpublikar sa listahan, ang buhaton sa Philippine National Police (PNP) mao ang pag monitor kanila.

Wa silay katungod nga mowagtang sa usa ka politiko sa maong listahan sanglit ang PDEA lang ang dunay gahom.

“Yes we’ll be supporting ana, para mahibaw-an sa mga tao. Kabalo ka, high time na nga ipang gawas nato ni para mahibaw-an sa mga botante og kinsa ni. Kay kon ato itago-tago nang listahan, di ma hibaw-an,” pasabot ni Sinas.

Gisuwayan pag kuha sa ilang habig ang mga opisyal sa PDEA-7 apan giingong toa sa kaulohan si Regional Director Wardley Getalla ug di usab matawgan sa iyang duha ka telepono.

MISUPORTA

Sila si DDB chairperson Catalino Cuy ug PDEA Director Aaron Aquino pulos nangsuporta ning mao nga lakang.

“Just like what we did before the barangay election, siguro it would be advantageous and beneficial for the voters to know kung ano ‘yung background nung mga candidates sa lugar nila, lalo na kung meron mga alleged or reported involvement sa illegal drug activities,” nagkanayon si Cuy sa usa ka press conference sa miaging adlaw.

Apan si Aquino niingon nga naghuwat pa sila og pagtugot gikan kang Duterte sa pagpublikar niini.

Niadtong Abril 30, sa wa pa ang barangay elections, ang PDEA nipagawas sa mga ngan sa mga barangay opisyal nga nangalakip sa drugs watchlist sa Presidente.

/ ALAN TANGCAWAN ■GIPATAY. Nagbuy-od na si Wendel Tampos, usa ka high value target (HVT) sa Mandaue City Police Office (MCPO), human pusila patay sa wa pa mailhing mga killer kagahapon sa kaadlawon sa may dan A.C. Cortes, Barangay Guizo, dakbayan sa Mandaue. Si Tampos drug surrenderer, apan giingong nibalik sa illegal drug business. Estorya sa pahina 2.