Hontiveros miuna og file sa iyang CoC, nag-abot og si Tumulak

Unang niduso sa iyang certificate of candidacy si kanhi Philippine Basketball Association (PBA) Cebuano hotshot Dondon Hontiveros kay sa iyang kaubanan sa Barug PDP Laban kagahapon sa buntag.

Tungod niini, nagkaabot sila si Hontiveros ug Konsehal Dave Tumulak sa buhatan sa Commission on Elections (Comelec) sa pag-file sa ilang CoC.

Si Tumulak uwahi og usa ka adlaw sa iyang grupo nga Bando Osmeña Pundok Kauswagan (BOPK) sanglit uwahi niabot ang iyang certificate of nomination and acceptance (CONA) gikan sa Nacionalista Party (NP).

Si Hontiveros niuna og usa ka adlaw sa iyang grupong Barug PDP-Laban, nga mo-file sa ilang tibuok slate karong adlawa.

Sa wa damha, ang duha nga lumad nga taga Basak Pardo, giubanan ni Bise Mayor Edgardo Labella.

Diha sab silang Konsehal Raymond Garcia ug Ernest Herrera nga magpapili usab sa north district.

Ang kanhi All Star sa PBA kinsa maoy usa sa mga sinaligan sa San Miguel Beermen, niingon nga di siya makaapil sa filing sa CoC karong adlawa sanglit adunay siyay dinaliang adtuon sa Manila.

Iyang gibutyag nga ang kasinatian niya sa natad sa paugnat sa kusog maoy iyang gustong ipaambit sa mga Sugbuanon hilabi sa mga batan-on sa dakbayan, di lang sa south district.

Karong buntag, ang Barug PDP-Laban ni Labella ug tibuok slate sa north ug south district uban ang ilang mga sakop sa pamilya ug supporters mag-abot karong alas 7 sa buntag.