CSBT nabalaka nga bus mahurot sa Kalagkalag

Giawhag sa management sa Cebu South Bus Terminal ang tanang local government units (LGUs) sa habagatan nga karong umaabot Kalagkalag mopagamit sa ilang bus kon pananglitan magnihit na ang bus sa terminal.

Tungod kay gilauman nga motubo pa ang pagdagsa sa mga tawo karong umaabot Kalagkalag tungod kay gawas sa long weekend kini, aduna’y dugang rota ang napuno sa CSBT.

Nihangyo si Jonathan Tumulak, operations manager sa terminal, sa tanang LGUs sa habagatan nga mosanong sa ilang hangyo aron aduna’y masakyan ang ilang mga residente sa panahon nga magnihit na ang bus.

Atol sa inter-agency meeting sa CSBT inubanan sa mga LGU, gusto ni Tumulak nga magamit kining bus sa tagsa ka lungsod ug dakbayan nga masakyan sa mga mabdos, senior citizen, persons with disability, ug uban pa, nga mouliay sa ilang lugar.

Sa hangyo ni Tumulak, gusto niya nga karong umaabot Oktubre 31 sa udto mo-standby nang mga bus tungod kay mao kini ang adlaw nga dagsa ang pasahero.

Base sa ilang nakita niadtong nakalabay nga tuig, mao sab ni ang adlaw nga hurothurot ang bus.

Niadtong 2017, niabot sa 266,550 ang natala nila nga pasahero sukad Oktubre 27 hangtod Nobiyembre 2.

Karong tuiga ilang gilauman nga mosaka pa kini ngadto sa 300,000 ka pasahero sulod sa usa ka semana nga datus.

Sa pagkakaron, aduna’y 290 ka mga bus ug minibus ang nagbiyahean sa CSBT paingon sa mga rota niini.

Apan giklaro ni Tumulak nga ang pwede mosakay sa bus sa LGU kini ra usab nga mga residente sa LGU diin libre kini.

Sa bahin sa Land Transportation Office (LTO) 7, magsugod ang ilang inspeksyon sa mga bus karong Lunes, Oktubre 22.

Samtang ang Land Transportation Franchising and Regulatory Board (LTFRB) 7, andam na manawat og request alang sa special permits karong Kalag-Kalag.

Mas gipahugtan usab sa CSBT ang ilang seguridad sulod sa terminal diin di na mamahimo nga makasulod ang porter nga wa’y uniform ingon man dili na makasulod ang dispatcher ug helper sulod sa terminal. /