Kuyaw ang San Fernando?

Human masuspenso, nakabalik na ang 23 ka mga quarry operator sa ilang operasyon sa pagpangubkob sa yuta alang sa raw materials sa paggamag semento.

Giingon nga 8 ang large scale (dagko) nga quarry operators ug 15 ka mga sand (baas) ug gravel (batong pino) nga may mga permiso sa pagpanguha niini.

Kuyaw ang San Fernando kay moray lungsod sa Pilipinas nga duhay pabrika sa semento. Pila kaha sa walo ka operators nga nia sa San Fernando?

Makita ron diha sa kabukiran sa lungsod ang nagkatag nga mga hulpa sa quarry nga kalihukan. Dunay bungtod sa Bugho nga napapas sa kubkob sa quarry.

Ang giso o anapog (limestones) maoy nag-unang materyal sa paggamag semento nga daghan o naglangkob sa kabukiran sa San Fernando hinungdan nga may 2 ka pabrika sa semento.

Di gyud unta angay nga dunay pabrika sa semento ang usa ka dapit kay dakong hulga sa kinabuhi: landslide tungod sa quarry ug sakit sa baga tungod sa abog.

Agi sa South Poblacion karon, malumos mo sa abog gikan sa duha ka mga pabrika nga nagyaka morag nagpahimus sa kahuyang sa makaluluoyng mga lumolupyo sa barangay.

Abog ra ba nga chemically treated nga piligro tawon sa mga baga sa kabatan-onan nga malaglag. Okey lang ang mga tiguwang kay nakapahimus na.

Giingon nga mokaylap ang abog sud sa 500- meter radius sa gilay-on sa planta. Igo ang Panadtaran, Balud, Sangat,Tonggo, San Isidro ug Pitalo inigbuylo sa hangin.

Kinsay nagpasud ning 2 ka pabrika sa San Fernando? Piniliay na sunod Mayo. Naay mga opisyal nga magpapili pag-usab. Susiha kinsa ni sila kay gilawog lang mo sa kamatayon.

Mga lider nga wa magtan-aw sa atong kaugmaon. Mag-ampo mo nga way mahitabo sama sa Sindulan tragedy kay kamo man gyud ang masabod.

Paging DENR! labi na sa MGB nga ma-inspeksiyon nila ning Taheiyo Cement Philippines ug Mabuhay Filcement kon nagsunod ba sa R.A. 7849 (Mining Law) o ubang environmental laws.