Seaman-ngingilad

Dear Papa Joe,

Tawga lang ko og Bb, 19 years old, nagpuyo diri sa B. Aranas, Cebu City. Ang akong problema mahitungod sa love life. Nakarelasyon ko og seaman. Wala diay siya magsulti kanako sa tinuod. Usa diay siya ka minyo nga layo sa iyang asawa. Abi ba man nako nga ulitawo siya kay wa man sa imik iyang mga kauban sa boarding house. Pero mao diay tagsa ra mi magkita kay mag-ulian man diay siya sa iyang pamilya.

Tungod siguro sa akong kabatan-on, mao nga nailad ra sad ko. Unya kuwang sad ko’g pagmahal sa akong mga ginikanan maong nisantop sa ing ani akong kapalaran. Maayo baya siya nako ug nahigugma gyud ko niya mao nga gihatag nako sa way pagduda-duda ang akong kaputli niya kay iya man kong gisaaran nga pakaslan, pero wala pa nako siya mahibawnga minyo siya.

Nahibulong na lang ko nga gisulong ko sa iyang asawa sa among balay ug didto gipakauwawan ko. Sakit kay inosente kaayo ko adtong higayuna tungod kay bata pa lagi ko. Sakit nga gibinuangan ko sa lalake nga akong gimahal. Murag gidakdakan ko sa kalibutan nga wa koy laing mahimo kon di ang paghilak na lang.

Nisamot ang kasakit kay after usa ka buwan akong nahibaw an nga nagbunga ang among gisaw-an nga kalipay. Karon wala na siya, wala na sad koy balita. Unsa man akong buhaton nga six months na man akong tiyan. Unsa kahay ugma nako ug sa akong anak? Paet karon akong gibati. Palihug tambagi ko.

BB

Bb,

Di pa katapusan sa imong problema. Sa gikaingon ko na, everything happens with a purpose. Ayaw huna hunaa nga katapusan na sa imong kaugmaon but a challenge nimo unsaon nimo pagdumala ang imong kaugmaon. Dili ra ikaw ang single parent. Naay daghan nga nahimong successful.

Paninguhaa nga maayo ang imong pag-anak ug paninguhaa nga makabarug ka dayon sa pagsuporta sa mahimo nimong anak.

Kadtong lalake dunay rason nganong wa siya mosulti sa tinud-anay kay basin mao nay giingon sa inyo nga “right love at the wrong time”. Paningkamot, Day, kay ang Ginoo naay gitagana nga maayo nimo kon magpabilin ka niya. Isalig tanan niya kay wala ta kahibawo puhon nga tagaan ra ka niyag nilalang nga maoy mopangga nimo og tinuod ug sa mahimo nimong anak.

PAPA JOE

(sa inyong tampo ipadala lang sa papajoesuperb@ gmail.com)