Don’t hurt my pride
Ambot ba sab, uy, nga misugot man ko sa gusto ni Nick nga mo-join nila ni Nelia sa pag-esnak? Wa na lang gyud unta to kay nakahibawo man gyud ko nga dunay kauban ang akong boyfriend nga girl? Karon nuon, naglibog ko sa sitwasyon namong tulo. Morag di ko masabtan ang gibati kong kakulba labi na kay seryuso kaayo si Nick nga nagbalhin-balhin og tanaw namong duha ni Nelia samtang nagkupot siya sa tagsa-tagsa namo ka kamot.
Na, nahasol gyud ko aning kahimtanga, uy!
“Kining, gusto ko nga makahibawo mong duha, Bel, Nel, kon unsa kamo sa akong kinabuhi.” Mitan-aw si Nick nako. “Kining, Bel, kini si Nelia uyab sab nako.”
Morag mobuto ang akong dughan sa kaguol ug kakugang. Si Nelia na sab ang gitan-aw ni Nick.
“Nel, kini si Bella girlfriend sab nako.”
Nakita ko ang gibating kakugang ni Nelia. Nanagko ang iyang mga mata nga mitan-aw kang Nick, ug dunay mga luha nga miagas sa iyang mga mata nga mitan-aw nako. Gilabni ko ang akong kamot nga gikuptan ni Nick. Nagdali kong mibiya kanilang duha ni Nelia. Ug sa gawas sa snack bar, wa na gyud ko makapugong sa gibati kong frustration. Nakahilak na gyud ko.
Pag-abot ko sa among balay, gidiretso kog patong sa dinning table ang usa ka plastik nga gisudlan sa akong gi-grocery. Nagpamahid ko sa akong mga mata nga misulod sa akong kuwarto. Gipahimutang sa among katabang ang mga groceries sa butanganan ani..
Wa pa sila si Mama ug Papa moabot sa among balay. Parehas silang dunay tag-as nga posisyon sa tagsa-tagsa ka opisina nga ilang gitrabahoan.
Mikuob ko nga naghigda. Kadali rang nahumod ang punda sa unlan sa akong mga luha. Gikasakit gyud kaayo nako ang akong nasayran. Duha diay kaming babaye sa kinabuhi ni Nick. Wa gyud ko magdahom ani. Mao gyuy akong pagtuo nga ako ra ang girlfriend ni Nick.
Apan duha diay ang nawong ni Nick. Wa siyay respeto namo ni Nelia. Klaro nga wa gyud. Imagine, nga gipaila-ila ming duha si Nelia sa usag usa, ug sa atubangan namong duha giangkon ni Nick nga girlfriend mi niya? How crazy!
Miginhawa kog sagunson. Gipasakitan ni Nick ang akong garbo. (SUMPAYAN)