ABUEVA GIPAMULTA
Mga duwa karon
4:30 pm- Alaska batok Columbian Dyip
7:00 pm- Rain or Shine batok NorthPort
Gipamulta sa Philippine Basketball Association (PBA) og kinatibuk-ang P10,000 si Phoenix Fuel Masters forward Calvin Abueva kagahapon gumikan sa managlahing mga insidente sa Philippine Basketball Association (PBA) Governor’s Cup.
Ang gitawag og The Beast gipamulta og P4,000 gumikan kay mipakita kini og dirty finger atol sa duwa sa Fuel Masters batok sa NLEX Road Warriors.
Nadugangan og P6,000 ang multa ni Abueva human kini mihimo sa samang salaod batok sa San Miguel Beermen.
Ning maong mga duwa, gipukan sa Fuel Masters ang Road Warriors, 123-97, apan nangahubog sila batok sa Beermen, 100-117.
Sa laing bahin, magpadayon ang mga kombati sa komperensya karong adlawa.
Sa premirong duwa, magsangka ang Alaska Aces ug ang nagkasalimoang nga Columbian Dyip samtang mag-abot sa main game ang Rain or Shine Elasto Painters ug NorthPort Batang Pier.
Ang Aces mosuway pagpaamag sa ilang poruhan sa sikit nga inilugay sa twice-tobeat nga bintaha sa nagkaduol nga quarter-finals.
Ang mopatigbabaw nga upat human sa single-round robin - diin tag-11 ka mga duwa ang sagubangon sa matag team – mao ang makapanag-iya og twice-to-beat nga bintaha sa quarter-finals.
Ang Aces kasamtangang naa sa ikaupat nga dapit dala ang 5-2 nga rekord sunod sa Blackwater Elite (6-2), Brgy. Ginebra Gin Kings (7-2) ug league-leader Magnolia Ang Pambansang Kamao Hotshots.
Apil ning kombatiha, ang Aces aduna na la’y upat ka mga duwa nga nahabilin diin kinahanglan nilang makahagpat og dugang kadaugan tungod kat delikado pa silang maapsan sa mga nagsunod kanila.
Sa ilang bahin, ang Columbian Dyip wala na’y poruhan nga makaabante tungod kay wala pa sila’y daog sulod sa walo ka mga duwa.
Apan labing seguro, mokombati og maago ang Columbian Dyip aron makabawon og moral sa ila unyang pagpanamilit.
Ang Batang Pier naa sa ikasiyam nga dapit bitbit ang 2-6 nga rekord samtang ang Elasto Painters naa sa ika-11 nga puwesto bitbit ang 1-4 nga baraha.