Junjun mikakak ni Gwen?

Morag dili ko kombinsido sa rason nga gipadayag ni Cebu Gov. Junjun Davide nga mi-slide siya sa pagka-bise gobernador gumikan kay dili siya gusto nga madamay o mapagan ang iyang mga kaubanan sa Liberal Party kon molansar siya pagbalik sa sunod tuig nga eleksiyon sa susamang posisyon. Anaa na unta sa third term si Gob. Davide sa sunod nga eleksiyon. Kana kon modaog. Niadtong miaging adlaw mifile na si Davide sa iyang certi icate of candidacy isip bise gobernador. Samtang gahapong adlawa mi-file si Vice Governor Agnes Magpale isip gobernador. Nagbayloay lang sila og posisyon. Mora man og salikwa-ot paminawon alang kang Junjun nga mislide down sa pagka-bise gobernador nga unta naa pa man siyay usa ka termino nga nahibilin. Maayo unta siya og modagan pagka-kongresista o ba kaha mayor sa usa ka dakong dakbayan.

Ang rason ni Davide nga mi-slide down siya kay aron dili madamay o mapagan ang iyang mga kaubanan sa LP. Kay kon dili kuno siya moslide down hinganlan kuno ang iyang kapartido nga “narco-politicians.” Unsaaa? Kay ngano man diay naa diay “narco-politicians” sa iyang grupo? Ang akong nahibaw-an nga ang Malakanyang maoy nagmaniobra niini ug ingon man si Davao City Mayor Inday Sarah Duterte. Niadtong miaging semana didto sila si Magpale, Toledo Vice Mayor Antonio Yapha ug ang anak niini nga si Gaye ingon man si Gigi Sanchez.

Wala kuno sakiti si Junjun sa iyang desisyon. Kaha? Nganong dili na man lang moangkon si Junjun nga mikakak o nahadlok siyang Gwen. Kay kon mapilde siya dako kining kauwawan o tamparus sa iyang liderato. Sa iyang duha ka termino wala yud siyay nahimo nga kalambuan.

Dili na maka-isyu og kurapsiyon si Junjun batok ni Gwen panahon sa kampaniya kay otro pod nga naghitak ang kurapsiyon sa iyang administrasyon nga binuhatan anang iyang mga alipores. Kanang mga alipores ni Davide diha sa Kapitolyo nga maoy naghatag og mantsa sa iyang administrasyon, pamutos na mo. Inihap na ang inyong mga adlaw.