Garcia mihimakak nga may bikil sila ni Almazan
Gipanghimakak ni Rain or Shine coach Caloy Garcia nga nagkabikil sila sa ilang sentro nga si Raymond Almazan nga maoy giingong hinungdan nga wala na kini mopakita sa team dulan sa duha ka semana.
Apan sa samang higayon, iyang giangkon nga iya kining gipahimatngonan kalabot sa pagsigi og ka-late ug pagpalta sa ilang
praktis nga wa niya damha maoy rason nga wa mopakita ang 6-8 nga sakop sa national team. “Just speaking on my behalf, nagulat nga ako na ako ang
tinuturo,” matod ni Garcia nga nakutloan sa Spin.ph sa iyang pamahayag sa unang higayon sukad sa kontrobersiyal nga kalit nga pagkawala ni Almazan. “At the end of the day, I’m just doing my job.”
Giingon ni Almazan nga iya kadtong nahimo sa dihang nagsigi sila og kapildi sa sayong bahin ning conference.
Nagtuo siya nga kadto maoy hinungdan sa pagkawagtang sa kanhi Letran star sa Elasto Painters sulod sa kapin usa ka semana.
Ingon ni Garcia nga wa siya magbasol nga iya kining gihimo sanglit isip coach iya man usab nga trabaho ang pagdisiplina sa iyang mga players.
Taliwala ning tanan, tinguha karon ni Garcia nga magkaistorya sila ni Almazan aron mahapsay kining tanan.
Hinuon, gikatakdang makighimamat si Almazan uban sa iyang agent nga si Danny Espiritu ngadto ni Atty. Mondragon, team manager sa Elasto Painters.