WALAY KONTRA
Di mominos duha ka paresan nga magpapili pagka mayor ug bise mayor sa lalawigan sa Sugbo sa eleksyon sunod tuig ang manginahanglan lang og usa ka boto aron pormal nga ideklarar nga mananaug.
Ang mag-inahan nga sila si Consolacion Mayor Teresa Alegado ug ang iyang anak nga si Konsehal Joannes Alegado ang way nakig-atbang.
Samtang sa lungsod sa Badian, wa usab nakigkontra nila ni Badian Mayor Carmencita Lumain ug Bise Mayor Fructuoso Caballero nga magpasubli sa umaabot piniliay.
Si Teresa nga naa sa iyang ikatulo ug katapusang termino, ang magpapili sa pagka bise mayor samtang ang iyang anak nga si Joannes, nga numero uno karon nga konsehal sa lungsod ug usa ka obstetrician, ang magmayor.
Ang kasamtangang bise mayor ni Teresa nga si Dr. Aurelio Damole ang nikanaug ug nidagan sa pagka konsehal sa lungsod,
Si Mayor Alegado niingon nga wa siya masayod sa rason kon nganong wa kini modayon og pakig-atbang nila sa piniliay.
“Ang ganti ni sa mga pag-ampo nga naa lang ta kalinaw. Nakita nila nga ang atong panerbisyo kinasingkasing, wala man ta nagpakasala sa katawhan ug Ginuo. Magpadayon ta sa atong serbisyo,” pamahayag ni Teresa.
Siya nalipay nga sukad 2010 hangtod karon, sila gihapong grupoha ang nag-uban alang sa pagpapili sa 2019 midterm elections. “Unsay nakita ninyo ron sa Consolacion gikan niadtong 2010 ug hangtod karon, aw, ato pa nang palambuon the more, dili man mahimo nga mo-stagnate ta,” dugang pamulong sa 61 anyos nga mayor.
Apil sa mga proyekto ug programa nga ipadayon nila og patuman sa bag-o unyang termino ang paghan-ay sa comprehensive land use plan (CLUP), pagpatukod og dugang evacuation centers, solid waste management ug proyekto batok sa mga baha.
Samtang, nipasabot si Teresa nga ang iyang pagbiya sa Liberal Party ug pagbalhin sa Partido Demokratiko Pilipino–Lakas ng Bayan (PDP– Laban) alang sa kaayohan sa ilang lungsod. “If I will not be under the ruling party, kanang luoy pud unya ko kay napa gud nay tulo ka tuig ang kanang presidente. Unya naa na ka, nasud na ka, nganong monaug pa man ka,” sigon ni Mayor Teresa.
Iyang gidugang nga bisan kon ang kandidatura ni Kongresista Gwendolyn Garcia ang iyang gipaluyohan sa sunod eleksyon, magpabilin ang ilang panaghigalaay ni Gobernador Hilario Davide III, kinsa iyang gipananghiran sa wala pa siya mobiya sa Liberal Party. “Sometimes it’s not a matter of kanang personal loyalty,
relationship mo-cherish gyud ko. The relationship (with Davide) stays but sometimes you have to look after how to protect your base, my base is Consolacion,” dugang ni Mayor Alegado.