Briton uban sa dalagita gidakop
Usa ka British national ang gidakop sa kapulisan sa Santander, Cebu tungod sa pagduda nga pedophile human nakita kini nga kauban niini ang 14 anyos nga dalagita nga mopaingon unta sa dakbayan sa Dumaguete.
Ang langyaw nihimakak nga iyang uyab ang menor de edad ug niingon nga usa kini lang nga tour guide.
Ang nadakpan giila nga si Sebastian Cole, 33, taga Lai Isan Tabor Heights, St. Belarg, Jersey, United Kingdom, ug kasamtangan nga nagpuyo sa Sitio Sangi, Barangay Madridejos, lungsod sa Alegria, Cebu.
Matod ni Sr. Insp. Margarette Yosores, hepe sa Santander police station, nga nakadawat sila og taho labot sa usa ka langyaw nga adunay kauban nga batang babaye nga sama sa uyab tungod kay nag kinoptanay kini sa ilang mga kamot.
Dali nga giadto sa mga pulis ug ilang naabtan ang langyaw nga padung na mosakay sa barge sa Puerto del Sur port sa Barangay Liloan, Santander.
“Nakita siya sa mga tawo didto nga nagdala siyag minor nga babaye. Gikan sila didto sa other side somewhere sa Alegria. Mosakay sila padulong sa Dumaguete,” matod ni Yosores.
Giangkon sa dalagita, kinsa taga Alegria usab, nga giagni siya sa langyaw nga mouban sa Dumaguete aron manuroy.
Apan gihimakak sa langyaw nga iyang uyab ang menor de edad sanglit iya lang kining tour guide sa ilang pagsuroy sa Dumaguete.
Wala motuo ang mga pulis sanglit walay kauban ang dalagita nga nakigkuyog sa langyaw nga maoy hinungdan nga giimbitar kini paingon sa police station aron ipaubos sa imbestigasyon
Ang nakita karon nga problema ni Sr. Insp. Yosores sanglit ang ginikanan sa bata wala mokooperar sa kapulisan sanglit ang bata nahimo usab nga “willing victim.”
Bisan pa man niini gipasalig sa Santander police station nga ilang ipasaka gihapon ang kasong child abuse batok sa langyaw.
Kung mamatud-an usab sa ilang imbestigasyon nga ang inahan adunay kalabutan sa pagpakuyog sa ilang anak sa langyaw ipalakip nila kini sa pagpasaka og kaso.
Samtang sa miaging hapon nasikop usab sa Women and Children Protection Center (WCPC) 7 ang usa ka 51 anyos nga American national sulod sa iyang apartment sa General Maxilom Avenue, dakbayan sa Sugbo.
Matod ni Chief Supt. Debold Sinas Director, direktor sa Police Regional Office (PRO) 7, ang modus sa maong langyaw giingong mokuha og hubo nga video sa mga minors ug i-upload dayon kini sa internet.
Gipakagamay lang ni Sinas ang pagsiaw karon sa mga langyaw nga nangadakpan tungod sa pagdala sa mga dalagita o menor de edad sa kasong pedophilia sa Central Visayas.