Crime rate sa CV

Wow! Ang Police Regional Office (PRO) 7 mao diay nag-una karon sa crime solution efficiency rate sa tibuok nasod. Buot ipasabot nga ang atong mga tinugyanan sa balaod dinhi sa Central Visayas maoy pinakadaghan og kaso nga nasulbad, sigon sa gibutyag ni PRO 7 Director Debold Sinas ngadto sa mga tigbalita kagahapon.

Ang report nakuha sigon sa data sa Camp Crame ug gibasehan ang siyam ka mga buwan ning tuiga kon itandi sa unang siyam usab ka mga buwan sa niaging tuig.

Matod pa nga moabot og 28,828 ka mga kaso ang nasulbad o 7.78 percent sa mga krimen ang nahatagan og igong solusyon.

Sikit nga nagsunod ang PRO 1 nga may 7.77 percent ug ikatulo ang National Capital Region (7.76 percent).

Dugang sa report, nga sa probinsiya sa Sugbo (gawas sa mga dakbayan sa Cebu, Lapu-Lapu ug Mandaue) ang gidaghanon sa krimen gikan sa buwan sa Hunyo ngadto sa Septiyembre, mius-os kuno ngadto sa 16,417 kon atong itandi sa 19,226 sa niaging tuig.

Niadtong Hunyo 1, mao say pagsugod og lingkod ni Sinas isip PRO 7 Director puli ni Sr. Superintendent Robert Quenery.

Ug di usab nato ikalimod nga sulod niining mga buwana nagsunodsunod ang patay sa nagkalainlaing dapit dinhi sa Sugbo nga naglakip sa mga dagkong opisyal sa gobiyerno ug mga inilang pribadong individual. Kini gawas pa niadtong mga ordinaryo lang nga mga gipangtipi.

Gani, kining mga maduguong panghitabo nga sagad wa ta makadungog nga dunay anino sa hustisya nga migimaw, nakakuha sa atensiyon sa mga senador kinsa mitakda sa pagpahigayon og imbestigasyon kalabot niini.

Wa man tuod nato hingpit isirado ang atong pagtuo nga dunay katinuoran kining maong report, pero salikwaot paminawon nga lahi ang nasinati sa publiko, unya lahi usab ang ilang ipatuo.