6 ang nasikop, P300T nga drugs nasakmit

Unom ang nasikop ug dulan P300,000 nga kantidad sa shabu ang nasakmit sa kapulisan sa dakbayan sa Talisay ug Sugbo atol sa operasyon niini batok illegal nga drugas sulod sa siyam ka oras.

Usa sa nasikop ang 17-anyos nga lalake sa Barangay Sawang Calero. Kagahapon sa alas 8:30 sa buntag dihang nasikop si Jhon Patrick Yap, sa Sitio Manipis, Barangay Campo 6, dakbayan sa Talisay.

Nasakmit sa operasyon ang duha ka medium ug upat ka gagmay nga mga pakete sa shabu nga aduna’y gibug-aton nga 10.16 gramos diin nagkantidad og P119,888 base sa Dangerous Drugs Board (DDB) value.

Lakip sa nasakmit ang usa ka .357 caliber revolver ug pito ka mga bala.

Alas 12:15 sa kaadlawon kagahapon usab dihang nasikop sila si Ryan Paca ug Lucresio Docdoc sa Sityo Palsy, Barangay Sambag, dakbayan sa Sugbo.

Nakuhaan ang duha og pinakete sa shabu. Sa Tupas st., Barangay Sawang Calero, dakbayan sa Sugbo nasikop ang menor-de-edad nga lalake alas 11:45 sa gabii sa Biyernes.

Nakuhaan kini og 41 ka gagmay nga mga pakete sa shabu nga nagkantidad og P34,000.

Samtang 15 minutos ang nakalabay dihang nasikop usab sila si Christian Baliguat, 21, ug Ramil Estremos sa Sitio Puntod, Barangay Mambaling.

Nakuha gikan sa duha ang duha ka medium nga pakete sa shabu nga aduna’y gibugaton nga 11.5 gramos ug nagkantidad og P135,700 base sa DDB value.