Hugpong kontra PDP sa 2019?

Abi nako nga sa Davao lang kining panagbangi sa Hugpong ng Pagbabago (HnP) ni Mayor Sara Duterte-Carpio ug ang PDP-Laban ni kanhi speaker Bebot Alvarez. Murag naabot na man diay kini sa Sugbo.

Makita nato kini sa duha ka mga babaye nga nag-atbang karon alang sa pagka gobernadora sa Lalawigan sa Sugbo. Si Kong. Gwen Garcia kay kandidato sa PDP-Laban samtang si Bise Gobernador Agnes Magpale sakop sa BAKUD kun Barug Alang sa Kauswagan ug Demokrasya (BAKUD) kay kaalyado sa Hugpong ng Pagbabago.

Atong nadunggan gikan sa kampo ni Mayor Luigi Quisumbing nga si Mayor Sara mismo moanhi sa Sugbo ug kini gipangandaman sa mayor.

Hinuon, ang piliay sa Mayo 2019 isip mid-term ug local ang kinaiya niini, kon si kinsay mananaog mag-agad sa kaugalingong kusog sa mga local nga kandidato.

MGA GULLAS

Sa wala pa ang deadline sa pagsang-at sa certificate of candidacy, nagkanayon kini si Cong. Samsam Gullas nga sila committed alang sa kadaugan ni Cong. Gwen Garcia. Kini bisan pa sa ilang anunsyo nga ang Alayon kaalyado na sa Hugpong ni Mayor Sara.

Tuod man, wala butangi og kaatbang ang mga Gullas sa PDP-Laban. Apan unsang pagkaunsaa nga nilubad na man ang pamahayag ni Mayor Eddie Gullas karon?

LIBERAL MAPAPAS

Tungod sa maong kalambuan, atong nakita nga nawala ang mga Liberal.

Una, halos tanang mga mayor sa mga LGU units, namali ngadto sa PDP-Laban ug kang Presidente Duterte sa miaging Nobiyembre 17, 2017 sa oathtaking nga gipahigayon diha sa Plaza Independencia. Tungod kini sa paninguha nilang Presidential Assistant Michael Lloyd Dino ug Speaker Bebot Alvarez.

Ikaduha, ang ubang gipayungan sa Liberal Party kaniadto nibalhin sa laing partido. Pananglitan, ang kasagaran nga sakop sa Bando Osmeña Pundok Kauswagan (BOPK) karon naa na sa LDP nga gipangulohan ni Sen. Sonny Angara.

Ikatulo, ang nagpabiling sakop sa LP sama kang Gob. Junjun Davide nidagan na lang karon alang sa pagka bise gobernador.

Kon maingon nato nga mga dilawan karon mao na lang kining mga midagan alang sa pagka senador isip sakop sa Liberal Party. Pipila ra man kini sila? Walo? Di gani makakumpleto og 12 sa ilang slate.

MANGAOANG

Nakalitan kita nga nakakita kang Collector Des Mangaoang nga nahimong testigo nga maisogong nitestimonya nga dunay sulod nga shabu ang magnetic lifters nga nasakmit sa usa ka bodega sa Cavite.

Tungod sa iyang pagtestigo, nabalitaan na nato nga dunay nihangyo sa Presidential Anti-Corruption Commisson (PACC) nga siya ipa lifestyle check. Apan, makadasig nga wa kini hatagig gibug-aton sa PACC. Go, go, go Maam Des!

Kon naa may crime at least, we were able to solve them. Kon dili man tanan, at least katong pwede i-solve, i-solve gyud to para mogamay ang mga unsolved crimes.”

- Chief Supt. Debold Sinas sa pagkahimo sa Police Regional Office (PRO) 7 nga no. 1 sa pagsulbad sa mga krimen