Don’t hurt my pride

Kon naa ko sa kaguol unongan gyud ko ni Dino. Motambag siya nako ug iya kong dasigon. Sukad pa sa among pagka bata suod na ming duha kay silingan ra man mi. Klasmet pa gyud mi gikan sa elementary hangtod na sa hayiskol. Usa ra sab ka university ang among gitunghaan karon nga second year college na mi. Hinuon, lain-lain ang kurso nga among gikuha.

Gihunahuna ko pag-ayo ang gisulti ni Dino.

Husto man sab tingali siya. Angay gyud nakong sutaon ang tinuod kong feeling ngadto kang Nick. Sakit man tuod ang iyang gibuhat nako apan sa laing bahin, unsaon na man lang kon love gyud nako siya? Mas sakit tingali kon paantuson ko ang akong kaugalingon?

Nanglabay ang mga adlaw. Kanunay nagpadalag text message si Nick nako. Kanunay siyang nangayog pasaylo nako, ug kanunay sab niyang ipadayag nako nga nahigugma siya nako sa tinuoray. Dunay mga adlaw o kaha gabii nga di ko mahimutang. Sa matag teks ni Nick nako di ko siya replayan. Sa panahon nga nag-inusara ko, di nako kapugngan nga mahunahuna ko si Nick.

Nakahibawo ko kon unsay buot ipasabot ani. Di ko mahimong masayop. Nahigugma pa gihapon ko kang Nick. Usa ka pagbati nga di ko unta angay hatagan og dakong pagtagad apan unsa may akong mahimo? Makasupak ba diay ko sa pinitik sa akong kasingkasing? Tinuod nga gipasakitan ni Nick ang akong garbo, apan unsaon na man lang sab ang akong paghigugma kaniya?

Nakapanghupaw ko samtang nagsandig ko sa headboard sa akong kama. Lawom nang gabii apan wa gihapon ko makatulog. Gitan-aw ko ang mga letra sa akong selpon nga ganina ko rang gikuptan. Gusto kong tawgan si Nick. Apan wa gyud nako kini buhata. Mas gipalabi ko ang akong pride. Di ko gusto nga ipaubos ko ang akong garbo tungod sa gugma ko kang Nick.

Sa laing bahin, nahunahuna ko sab kon angayan pa ba nga hatagan nakog pagsalig si Nick kon makigbalik ko niya? Di kaha ko niya katawan sa hilom kon makig-uli ko niya?

Mikiring ang akong selpon. Usa ka incoming call. Sa akong pagsusi, si Nick ang nagtawag nako.

(TAPUSON SUNOD GULA)