P1.2M DANYOS SA SUNOG; 2 ANGOL
Mokabat sa P1.2 milyones ang gibana-bana nga gibiling danyos sa sunog nga niugdaw og unom ka mga panimay sa Tube Ice, Sitio Lower Sampaguita sa Barangay Banilad, dakbayan sa Mandaue pasado alas 10 kagahapon sa buntag.
Tulo ka tag-duha ka andana nga puros mga ginama sa konkreto nga mga panimay ang naugdaw, samtang laing tulo usab ka mga panimay nga sagol ginama sa concrete ug light materials ang nakan-an sa sunog.Ang sunog giingong nagsugod sa duha ka andana ug konkreto nga panimay ni Eduardo Mendez, kinsa nagpaabang niini.
Matod ni SFO1 Noel Codilla, fire investigator sa Mandaue City Fire Station, nga under investigation pa kun unsay hinungdan sa sunog.
Apan usa sa ilang gisubay ang giingong usa sa mga nagabang mao ang ginganlan og Rolando Molato, nga anaa sa ikaduhang andana, ang giingong nagluto sa dihang kalit lang nibuto ang LPG tank nga gigamit.
Giingong depektuso ang hose nga nagkonektar sa LPG tank ug sa gigamit nga stove.
“Sa cause sa fire, under investigation pa. Ato ni gitan-aw ang gi-alleged nga nagluto ni si Rolando Molato, nya naay buslot ang hose nga connected sa LPG, nag-leak ni mao to mibuto ug nakaingon sa sunog,” gitug-an ni Codilla.
Si Molato ug silingan niini nga si Jake Osorio ang nakaangkon og first degree burn, wa ra hinuoy gikatahong nakalas sa sunog.
Nadawat sa kabomberuhan ang alarma sa sunog alas 10:48 ug nakontrolar kini alas 11:35 sa buntag, giisa kini sa 3rd alarm.
Samtang sa bakanteng luna duol sa lugar nga nasunugan kasamtangang nipahimutang ang pipila sa mga biktima sa sunog, ug sugod na usab sa pagpanglista ang City Social Welfare and Services sa mga pamilya ug indibdwal nga naapektuhan sa sunog, alang na usab sa pag-apud-apud sa mga pagkaon ug uban pang hinabang. /