Mga machine gun nangabot sa PRO 7

Mga bag-ong light machine guns nga napalit sa Philippine National Police gikan sa Israel, lakip na mga sakyanan ug motorsiklo, gipangapod-apod na sa Police Regional Office 7 sa tanang city ug provincial police office.

Ang maong mga machine gun alang sa internal security operation, diin gamiton kini sa mga pulis nga magpatrolya sa kabukiran sa Central Visayas.

Sa wa pa hingpit nga gihatag ang mga sakyanan, gisubhan una kini sa hepe sa PRO 7, Chief Supt. Debold Sinas ug director sa Logistics Support Service sa Camp Crame nga si Chief Superintendent Restito Gatera.

Ang Camp Crame mihatag sa 15 ka mga motor, 15 ka bagong Toyota hi-lux, 160 ka Kevlar helmets ug 416 ka vests.

Matod ni Supt. Reyman Tolentin, information officer sa PRO7, nga tag-as nga mga kalibre sa armas alang sa mga sakop sa Regional Mobile Force Battalion, City ug Provincial Mobile Force Company alang sa ilang internal security operations. Sa syudad sa Sugbo, ipaubos una sa training ang mga pulis nga tahasan nga mogamit sa machine guns aron ma master niini ang pag operate ug malikay sa disgrasya.

Matod ni Cebu City Police Director Sr. Supt. Royina Garma nga dakog matabang ang maong taas nga kalibre sa armas sa ilang pagpatrolya sa mga bukirang barangay sa syudad sa Sugbo nga adunay mamatikdan nga mga armadong tawo.

“Sa anti drug operation Swat, ang ginagamit natin sa assault sa umpisa. We will only use mga special weapons in extreme situation where there is already in danger na yung ordinary policeman...kase kung biglain mo at kung may mamatay dyan, patay tayo dyan. Human rights na pud ta,” matod ni Garma.

Gipasalig sa PRO 7 nga dili gamiton sa anti drug operation ang maong mga machine guns sanglit alang kini sa pagdepensa batok sa mga rebelde.