Drug rehab clinic sa Mandaue gi-turn over
Sugod sunod bulan, libreng pakonsulta, medication lakip na ang counseling alang sa mga moderate-risk nga mga drug dependents sa dakbayan sa Mandaue human hingpit na nga gi-turnover kagahapon ang pasilidad gikan sa Department of Health (DOH).
Labing una kini sa Kabisay-an ug lakip sa unom ka mga pilot clinic sa tibuok nasud.
Sa inisyal, adunay dul-an sa 600 ang nasuta nga moderate-risk nga mga drug dependent sa kapin usa ka libo nga na-screen na sa mga drug surrenderer sa syudad sa Mandaue.
Adunay kapin sa 5,000 ka mga drug surrenderer ang Mandaue City, diin kapin sa 300 na kanila ang ni-graduate na sa community-based rehabilitation program.
Matod ni Konsehal Kevin Cabahug, chairman sa committee on health sa City council, nga gatusan pa unya ang gilantawan nga mahuman sa CBRP karong Disyembre.
Ang nipaubos sa CBRP mao kadtong mga low o mild-risk drug dependents.
Samtang kadtong mga seriously o high-risk gipada ngadto rehab center sa lungsod sa Argao.
TABANG
Gitug-an ni Mandaue City Vice Mayor Carlo Fortuna nga usa sa ilang giproblema ang pagtabang sa mga moderate-risk, ug daku nalang ang ilang pasalamat nga gidungog ni Presidente Rodrigo Duterte ang ilang hangyo alang sa maong pasilidad.
Ang dakbayan sa Mandaue ang usa sa unom sa unang gipatukuran sa recovery clinic nga gigastuhan og P2.1 milyones sa national, pinaagi sa DOH.
Nahimutang kini sud sa compound sa Mandaue City District Hospital aron dali ra usab kon gikinahanglan ang mga laboratory test, nga ihatag usab gihapon nga libre.
Ang Mandaue City Health na ang bahala sa mga personnel nga modumala, naglangkob na niini ang mga doctor, nurse, psychiatrist, pshychologist ug social worker, alang sa libreng konsulta, medication, counseling, ug uban pa.
Dugang ni Fortuna nga sa maong proyekto, ma-address usab niini ang problema sa nagkataas nga ihap sa mga nataptan sa sakit nga HIV, diin ang central visayas ang usa sa labing taas nga kaso nga nataptan sa maong sakit lukop nasud.
Usa sa nakatampo niini ang mga magbayluay og syringes.
Mao usab kini ang usa sa gihimug-atan ni Dr. Emmanuel Tiongson,pangu sa Dangerous Drug Abuse Prevention and Treatment Program (DDAPTP) sa DOH kay uban usab sa mga adik ang nag-practice og di limpyo nga pakighilawas.
Usa sa gipahibalo nga di lang unya mga taga Mandaue ang makabenipisyo, apan si bisan kinsa nga anaa sa Central Visayas, hinuon priority ang Mandauehanon.
Gipasalig nila ni Dr. Edna Seno, pangu sa Mandaue City Health Office, ang confidentiality sa mga moduol ug magpatabang kanil, hinungdan nga giawhag nga boluntaryo nga moduol ug di na kinahanglang’ pugson pa sa barangay.
Gitug-an ni Seno nga ang maong treatment, kon sa pribadong clinic, nagkantidad og 30 ngadto sa P50,000.