‘Last-term’ councilors

Dunay posibilidad nga dili makompleto ang lineup sa mga kandidato sa Bando Osmena Pundok Kauswagan (BOPK) sa north district inig abot na unya sa kampanya alang sa umaabot nga mid-term election. Kini tungod sa sitwasyon karon nila ni Konsehal Sisinio Andales ug Konsehal Alvin Arcilla nga mga last termer na unta, apan nagpapili gihapon sa susamang position.

Ang gikuhaan og base sa duha nga mahimo gihapon silang makadagan tungod kay nalakip sila sa pagkasuspenso niadtong panahon nga mayor pa si Mike Rama sa dakbayan.

Ang ilang pagkasuspenso nagagumikan sa pagpagawas sa konseho og pundo nga gihatag ngadto sa mga City Hall officials ug employees isip financial assistance atol niadtong kusog nga linog nga miigo sa Kabisay-an, lima ka tuig ang nakalabay.

Kini giisip nila nga nagputol sa ilang termino ug sa samang higayon naghatag kanila og pagtugot nga makapasubli sila og balik sa mao gihapon nga posisyon.

Dili man tuod problema sa BOPK kon maaprobahan sa Comelec ang ilang kandidatora, pero kon sa higayon nga mahukman ug ma-disqualify ang duha, dinhi na unya sila maapikihan.

Dunay pangagpas nga mahimo rang hulipan sa BOPK ang kandidatora sa duha ug kon dili man gyud kini sila tugotan nga makadagan.

Pero unsaon man paghulip nga wala na may certificate of candidacy (COC) ang Comelec nga papirmahan ug papil-apan sa mopuli kay humana man ang deadline?

Di man sab mahimo nga ang COC sa gipulihan maoy gamiton sa mopuli kay usa man kini ka dakong mis-representation.

Niini, ang usa sa mga panghinaot sa BOPK nga dili sila makuwangan sa katig atol sa kampanya, nga unta human na sa election mopagawas og desisyon ang Comelec.

Kay mahimo pa silang moapelar kon modaog si Andales ug Arcilla.